Qullissat matuneraniit ukiunik 40-nngortorsiornissaq

Nunatta Isiginnaartitsisarfiata Qullissat matuneraniit ukiut 40-ngornera malunnartinniarlugu Vajgatip nipilersortartui nipilersussapput isiginnaagassiamillu takutitsisoqarluni

Nunatta Isiginnaartitsisarfiata aamma Vajgat Orkestret Qullissat matusaaneranit ukiut 40'nngornerat malunnartillugu isiginnaartitsissummik takutitsissapptu. Assi: ”Qulissat ikinngutaat Ilulissat”

Qullissat matuneraniit ukiut 40-ngornera malunnartinniarlugu katersuunnerup aallartinneqarnerani 6. juli Nunatta Isiginnaartitsisarfiata takuteqqaassuaa ”Qullissara”.

- Amaruutissarsiorfik Qullissat 1924-mi aallartisarneqarpoq 1972-milu inuerutsitaalluni. Vajgat Orkesterip nipilersuutaasa akornisigut illoqarfik, innuttaasa ataqatigiinnerat, assoroortarnerat, qiimanerat – allatut oqaatigalugu anersaavat – isiginnaagassiami oqaluttuarineqarpoq. Isiginnaagassiaq pisimasut maleqqissaarlugit allataanngilaq, isiginnaagassiortulli eqqaamasai pingaartitaalu ilanngunneqarsimallutik, Ilulissani Qullissat Ikinngutai nassuiaapput.

Vajgat Orkesterip nipilersuusiai Christian Søgaardimit aaqqissuuteqqinneqassapput, nipilersortartunik sisamanik erinarsortartunillu marlunnik atorneqassallutik. Aammattaaq Rassi Thygesen Else Danielsenilu isiginnaartitsisartutut ilaassapput. Isiginnaagassiortoq ilitsersuisorlu: Makka Kleist, Qullissani inunngortoq peroriartortorlu

Makka Kleist: Misigisaq sakkortooq
- Isiginnaagassiaq Qullisara takussallugu sakkortussaqaaq – avatagiisit taakkorpiaat pineqartut avatangiisingalugit – avatagiisit peroriartorfikka, Makka Klesit oqarpoq.

”Qullissarap" saniatigut isiginnaagassiaq ”Oqaluttuat sisamat” takutinneqassaaq ilaqutariinnut isiginnaagassiaq ulloq 7. juuli aamma 8. juuli, taassumallu oqaluttuariaaseq inuiattut itsarli pigisarput tunngavigaa.

Tupersuarmi Else Danielsen, Rassi Thygesen aamma Mike F. Thomsen oqaluttuanik sisamanik Rinkip allallugit katersaanit takutitsissapput.

- Oqaluttuat taakku kinguaariinnit kingornunneqaqattaarput, inuillu najugaqarfiini assigiinngiiaarlutik pigineqarlutik. Ilaat tupinnartuupput, allat quianarlutik, ilaasa itisuumik ilisimasaqassuseq imaraat, allallu amiilaartitsisarlutik. Isiginnaartitsisartut qangatut atisaqarlutik isiginnaartut qaneqqissaarlugit utimut kritumiussutsip siornanut pisissavaatigut – taamani anersaat silarsuaat inuunermut ilaaqataavikkallarmat. ”Oqaluttuat sisamat” Pipaluk Kreutzmann Jørgensenimit ilitsersorneqarpoq, Ilulissani Qullissat Ikinngutai oqaluttuarput.

Isiginnaagassiaq ”Qullissara” juulip arfineq pingajuani takutinneqassaaq.

Powered by Labrador CMS