D: Sussaanngilaq, Doris

Demokraatit qallunaat filminut tapiissutaannut nunattalu Danmarkimit "qinnuuloorneranut" Siumumiit Doris Jakobsen isornartorsiorpaat

Demokraatini naalakkersuinikkut oqaaseqartartoq Anda Uldum. Foto: Leiff Josefsen

- Nunami maani filmiliortartut danskinut tapiissutigineqartartunik piniartalissappata qinuloornerusanerarlugu Doris Jakobsenip oqarnera sakkortuumik Demokraatini akerlilerparput. Paarlattuanik naasorpassuarnik Sara Olsvigimut nassiusserusuppagut taanna ilungersorluni sulissusseqarusummat.

Taama Demokraatiniit naalakkersuinikkut oqaaseqartartoq Anda Uldum allappoq.

- Ukiaq Folketingimut qineqqusaarnermi Demokraatini ersarissumik oqaatigaarput, sulissutiginiarlutigu, kalaallit filmiliortartut, atuakkiortut, eqqumiitsuliortut allallu kulturilerisut danskit naalagaaffiata tapiissutigisartagaanik pisalersinnaanissaat. Taamaattumik nuannaarutigaarput Sara Olsvigip ulloq 1. februar Kulturimut ministereqarfimmut tutsuviginartunik apeqquteqarmat paasiniarlugu kalaallit filmiliortartut Dansk Filminstitutimut aningaasanik piniarsinnaanerat periarfissaqarnersoq.

Læs "Slut med at tigge fra Danmark"

Læs "Bedre vilkår for filmproducere"

- Pineqartoq partiitut anguniakkatsinnut ilaammat, pissangasimavugut Kulturministereqarfiup akissuteqarnissaanut. Tamanna takkuppoq ulloq 6. februar, itigartitsisoqarlunili. Kulturministereqarfiup innersuussutigaa kulturimut tunngasut kalaallit nunaata tigunikuugai taamaakkaluartorli kalaallit filmiliortartut danskinik suleqatissarsiorsinnaasut, suleqatigiinnerlu tamanna aqqutigalugu qinnuteqarlutik. Akissutip taamaattuunissaa Demokraatini kissaatigisimanngikkaluarparput, Anda Uldum nassuiaavoq.

Oqalliseriaaseq eqqumiitsoq
- Tamatuma kingorna pineqartoq imatut eqqartorneqanngilaq sapaatip akunnerisa pingasut missaanni, Siumup Folketingimi ilaasortaatitaata Doris Jakobsenip eqqumiitsumik oqallinneq ammarmagu. Sara Olsvig aamma maani nunami filmiliortartut tapersersortussaagaluarlugit tapersersuinngivilluni, Doris Jakobsen isummersorpoq oqarluni kalaallinut filmiliortartunut danskit tapiissagaluarpata tamanna qinuloornertut isigisariaqartoq. Inuit pikkorissut nassaarniallaqqissullu taamannak eqqartorneqarsinnaanngillat, Anda Uldum oqarpoq.

Naak Doris Jakobsen sakkortusaarluartoq, Demokraatini neriuutigaarput, Sara Olsvigip kalaallit filmiliortartut danskisut filmiliortartutullu isigineqartarnissaannik anguniagaqarluni sulinini ingerlatiinnarumaaraa – aamma kulturimut oqartussaaneq kalaallinit tiguneqarsimagaluarpalluunniit.

- Isumaqarpugut, kalaallinut filmiliortartut annertunerusumik tapiisalerneq kalaallit kulturiannut immikkuullarissumut ilisimasaqarnerulermik kinguneqassasoq – Danmarkimiinnaanngitsoq aamma silarsuup sinnerani. Tamanna tapersersorluinnartariaqarpoq, Anda Uldum oqarpoq.

- Demokraatini eqqumiigigaarput, Doris Jakobsen taamaasillunilu Siumut imminnut sorsuakkiaralutik oqalummata Danmarkimut qinulooqqittoqassanngitsoq. Tupinnaqaaq, parti folketingimut qineqqusaarnermut atatillugu aningaasartuutiminik danskit partiiannit akiliutsittoq taama oqalummat. Sussaanngilaq, Doris.

Powered by Labrador CMS