Danmarkimit qinnuuloorunnaarta
- Nunatsinniit Danmarkimut aningaasalik qinnuuloorunnaartariaqarpugut. Nammineq sapernata takutittariaqarparput, Doris Jakobsen oqarpoq
Nunarput nammineernerusinnaalertariaqarpoq.
Taam oqarpoq Siumut sinnerlugu Folketingemut ilaasortaq Doris Jakobsen, kalaallit filmiliortartut Danmarkimit tapiiffigineqartassanersut pillugit apeqqummi ersarissumik isummersorluni.
IA-p qallunaat filminut tunngasumik inatsisaata Kalaallit Nunaannut atuutilertillugu allanngortinneratigut Dansk Filminstitut kalaallit filmiliortartuinut/filmiliaannut tapiissuteqartartittalerniarsaraa.
- Tamannali politikkikkut sammisaqarfiusunik nunatsinnut nuussinerni tunngaviusumik isumamik saneqqutsinerunngilaa - matumani kulturemut tunngasutigut? Kulturemut tunngasut Inatsisartut akisussaaffigaat. Soormi aamma qallunaat filmilianut tapiissuteqartarnerannut atalissaagut, atuakkianulli, isiginnaartitsisartunut nipilersornermulluunniit tapiissutit pinnagit? Politikkimut tunngasut allat uagut akisussaaffigilersimasagut pillugit aamma taamatupajaaq oqartoqarsinnaavoq. Soormi aamma tapiissutisisinnaassaagut qallunaat inatsiseqartitsinerminni kalaallit inatsiseqartitsinerannit pitsaaneruffigisaanni? Doris Jakobsen aperaaq.
- Filminut tapiissutinut tunngatillugu pissutsit imaareerput kalaallit filmiliortut Danmarkimi filmilioqatissarsiinnarsinnaallutik qallunaat filminstitutimit tapiissutinik qinnuteqarsinnaalerniarunik. Sinneri nammineq naammassisinnaasariaqarpagut.
- Læs "Bedre vilkår for filmproducere"
Inatsisartuni
- Taamaammat Inatsisartunut siunnersuutiginiarpara 3 millioner koruunit ukiukkaartumik filminut tapiissutissatut imiikkoortinneqartassasut. Taamaasilluta kalaallit filmiliortartuini, isumassarsiaqartuni immitsinnullu qanoq isiginitsinnut iluaqutaaqataasinnaasumik aammalu nunatsinnik nunarsuarmi malunnaateqartitsinnaasumik eqqumiitsuliornissamut piumassuseqartuni, ineriartulerneq aallarnisartoq tapiissuteqarfigisinnaalissagatsigu, Doris Jakobsen oqarpoq.
Nalunngilaa 3 million koruunit atorlugit filmi "Nuummiutut" ittoq suliarissallugu naammanngitsut.
- Tamannalumi aamma siunertarineqanngilaq. Qanorluunniimmi pisinnaalluartigisunik peqartigigaluarutta, nunami allamiunik suleqateqarnissaq atorfissaqartipparput. Filmiliortartunik filmfestivalit aaqqissuunnissaannik ilisimasaqartunik, nunallu tamat akornanni filmimik saqqummilaartitsisinnaasunik.
- PAningaasallu tassa salliutillugu filmip pinngoriartortinneqaleqqaarneranut atorneqassapput. Isumassarsiatsialaap pileqqaarneraniit, tuniniarneqarsinnaasumik isumassarsiap filmiliortunut aningaasaliisunullu tuniniarneqarsinnaasunngorlugu ilusilerneqarneranut. Tassalu filmiliamut najoqqutassiornerup (manuskripter) ineriartortinneqarneranut aammalu assersuutigalugu isumassarsiamik takutitsisinnaasumik naatsumik takussutissiisiornernut, Siumumiit naalakkersuinermik suliaqartoq oqarpoq.
Nunatta nittarsaannera
- TV-kkut qallunaat nangeqattaartuliaat Borgen Tuluit Nunaanni takutinneqarmat, tuluppassuit Kalaallit Nunaat aatsaavissuaq takuaat. Nunatut takornariarfigineqarsinnaasutut. Filminut tapiissuteqarnerput aamma nunatta ilisimaneqarneranik siaruarterinermut peqataatitsisinnaavoq, taamaasilluni takornariaqarnerulerneranut nunanullu allanut tunisaqarnerunissamut tunngavisseeqataasinnaalluni. Pisinnaasortatsinnut tapiissutigisagut atorluagaapput. Kulturitsinnuinnaq pikkorissortatsinnullu taamaallaat tunnganngitsumik, aammali aningaasaqarniarnitsinnut.