Ineriartorsinnaanissaq Qaasuitsumi nuannaarutaavoq

Qaasuitsup Kommuniani Sinerissap avataani uuliasiorfimmut nunami inuussutissarsiutinut periarfissat nutaat

NQaasuitsup Kommuniani Sinerissap avataani uuliasiorfimmut nunami inuussutissarsiutinut periarfissat nutaat. Assi: Aqissiaq Mathiassen

- Kommunip sineriaata avataanni uuliasiornermut atatillugu nunami nunaminertani kommunip pilersaarutaanut tapiliutinik akuerisanik nutaanik Qaasuitsup Kommuniata tamanut saqqummiussisinnaanini assorsuaq tulluusimaarutigaa. Taamatut iliornitsigut ukiorpassuarni takkuttussani kommunitsinni suliaqarfiup nunaminertanik pisariaqartitsineranik inuussutissarsiutinilu suliaqarnernik naapitsisinnaanerput neriuutigaarput.

Taama oqaluttuarpoq Qaasuitsup Kommuniani pisortaaneq, Henrik Rafn, kommunalbestyrelse sinnerlugu.

- Sioqqutsisumik misissueqqissaarineq ’Offshore-Onshore’ kommunip pilersaarutaanut tapiliummut sanaartorfissanik arlalinnik toqqartuivoq. Toqqartuinerit taakku soorlu akunnittarfimmut sullissinermi atuuffinnut suli amerlanernik immikkoortortanik ilaneqarput. Sanaartorfissat ataasiakkaat pilersaarummi tassani ilaanngillat, ilassutissanik misissuinernik pisariaqartitsimmata. Kommunip inerisarnerup maannakkut aallartisarnissaa kissaatigisimavaa. Taamaattumik maannakkumiit nunaminertanik atugassiivigineqarsinnaasut nunaminertat neqeroorutigilereerpavut. Sioqqutsisumik misissueqqissaarinerup nunaminertat ilassutissanik misissuinissamik pisariaqartitsisut toqqartorpaat, Henrik Rafn oqarpoq tikkuarlugulu nernerit pigineqalerpata ilisimatitsisoqarumaartoq.

Nassuiaatigaa Qaasuitsup Kommunia maannakkut Aasianni aamma Upernavimmi sinerissami avataani uuliasiorfiup pisariaqartitaanik sanaartorfissanik naleqqussakkanik arlalippassuarnik neqerooruteqarsinnaalersoq. Immikkoortortat illuliornermi sanaartornermilu sulianut assigiinngitsorpassuarnik imaqarsinnaapput, inuussutissarsiutinut inersuit, ilioraasarfiit, akunnittarfiit umiarsualiveqarfiillu.

Nunaminertanik atugassiinissamik qinnuteqartoqarsinnaalissaaq.

Powered by Labrador CMS