Nunaminerals diamantinik nassaaruarpoq
Nunaminerals kimberlitinik immikkoortukkaanik arlalinnik nassaarnikuuvoq taakkua diamanteqarfimmit naakkaasimagunavipput
Kalaallit aatsitassarsiornermik ingerlatsiviat Nunaminerals ujaqqanik kimberlititalinnik arlalinnik nassaarpoq taakkua diamanteqarfimmit aallaavillit.
Ingerlatsivik aningaasaateqarfimmut allappoq.
- Nunaminerals ujaasiffimmit nassaat, diamantinik aamma pinngoqqaatinik misissuinerit ingerlatereerlugit paasivaat nassaarlutik. Misissugassanik nassaarfiup nunataata qaavanik pinngoqqaatinik misissuinerni aamma paasinarpoq diamanteqarnissaanut ilippanaateqarluartoq, Nunaminerals allapput.
Ingerlatseqatigiiffimmit piffinni arlalinni kimberlitit ujararujussuit immikkoortitertut nalunaarsorsimavai, annermik "Ulluni" nunataq 550x250 meterisut annertutigisoq misissuiffigisimallugu. Qaamasoq, Nuup avannamut kangiani Napasup kangiani inissisimavoq.
Ilisimalikkat qiimmaallannartut paasisaqarfigilluaqqikkumallugit Nunaminerals ukiup ingerlanerani suleqqissaaq. Nassaarfiup aallaavianik diamateqarfiusinnaasumik nassaarniartoqassaaq, taassumalu annertussussuserisinnaasaanik paasiniaanerit ingerlassapput.
- Pinngoqqaatinik misissukkat inerneri neriunaateqarput diamanteqarneranik uppernarsisippaatigut, diamantinik piiaanissaq aningaasatigut isertitsissutaasinnaaneranik naliliisinnaanngornissamut aqqummiippugut, Nunamineralsip pisortaa, Ole Christiansen oqarpoq.