Atuartut timigissassapput

Kommuneqarfik Sermersuumi atuarfinni ukioq manna aalanerunissaq anguniarneqassaaq. Aalanerpaat 25.000 koruuninnassinnaapput

Kommuneqarfik Sermersuumi atuarfiit ukioq manna timikkut aalaffiunerussapput. Assi: Leiff Josefsen

Kommuneqarfiup Sermersuup pingaarluinnartutut isigaa nalilerluguli meeqqat timi atorlugu aalajuarnissamut pingaaruteqarnera qaammarsaatigineqartuassasoq ulluinnarni minnerunngitsumillu atuarfimmi pissassaqartitsinerit aqqutigalugit

Taamaattumik kommuneqarfiup Get Moving atuarfinnut tamanut Atuarfimmi Timersorneq (Grønlandsk Skoleidræt) suleqatigalugu aallartippaa.

Suliniut 1. Marts aallartissaaq septemberip tungaanut ingerlassalluni, tamatumalu kingorna atuaqatigiit ajugaasut nassaarineqarumaarput, Kim Godtfredsen, Atuarfimmi Timersorneq oqarpoq.

Aalasamik aaqqissuinissat pingasut ingerlanneqassapput, massakkullu suli ukiuunerani sammineqartussat aallarniutigalugit aallarnerneqassalluni ukioq, aputillu periarfissai sammineqassallutik. Aappassaattut maaji peqqinnartuutigut atorlugu arpannerit nukittorsariaatsillu assigiinngitsut misiligarneqassallutik. Naggaserneqassaaq iligiikkaarluni arpannermut unamminerit arpaqatigiinnerillu nuannersut. Atuaqatigiit pointit amerlanerpaat katersussallugit anguniassavaat.

1. marts – 31. Marts tungaanut illuikkiullaqqinnerpaat aammalu apummik ilusilersuillaqqinnerpaat toqqarneqassapput, taakkulu angusarisat maajimi arpannissanut aamma ilanngunneqassapput sulilu ilaqqinniarneqassallutik, taamaasillunilu iligiikkaarluni arpannermi aamma angusarisat naggataatigut katinneqassapput amerlanerpaanillu pointinik katersisimasut Aalasa 2012-mi ajugaassapput.

Aalasa 1: Sisoqqanneq, apummi pinnguarneq, illuikkiorneq, apummik ilusilersuineq

Aalasa 2: Maaji Peqqinnartoq, arpaqatigiinneq, nukittorsariaatsit pingasut

Aalasa 3: Iligiikkarluni arpanneq, arpaqatigiinneq

Atuaqatigiit amerlanerpaanik pointinnattut 25.000 kr-ninik akissarsiassaqarput. Nr. 2: 10.000 kr. Nr. 3: 5.000 kr.

Powerpausit
Suliniuteqarnerup iluani aamma atuarfiit ”powerpausit” aallartissavaat. Tassaapput atuartitsinerup iluani naatsumik unillatsiarnerit.

- Tassaapput atuartitsinerup iluani naatsumik unillatsiarnerit.
Taamatut unillatsiartarnerit inunnit amerlanernit nuannersutut timimullu iluaqutaasutut isigineqarput. Nuannisarneq timimilu nuannersumik misigisaqartarnerit kajummissuseqartitsinerulersarput taamaalillutillu ilikkagaqarniarnerit suli iluaqutaanerusumik sunnertarlugit; tassa imaappoq iluaqutaasumik aammik kaaviiaartitsineq eqaarsaarnertalinnik unillatsiartarnernik aallartinneqarsinnaavoq, Kim Godtfredsen oqaluttuarpoq.

Aalasa Get Moving aaqqissorneqarnerani atuarfiit tamarmik ambassadørinik toqqaassapput, tassaasussaappullu suliaqarnermi torersumik ajunngitsumillu ingerlasoqarneranik akisussaaqataasussat. Ambassadørit aaqqissuisut qanimut suleqatigalugit nalilersueqataasassapput.

Powered by Labrador CMS