MIPI matuvoq nutaaq ammarpoq

Pingasunngornermi 29. februar 2012 nal. 15.00-17.30 MIPI – Meeqqat Inuusuttullu Pillugit Ilisimasaqarfik Hans Egedep Illuani ilassinnissaaq, tassa MIPI'p atorunnaarsinneqarneranut tunngatillugu.

MIPI'p atorunnaarsinnerata kingunerisaanik MIPI'mi sulisut meeqqat pisinnaatitaaffiisigut sullissivimmut nutaamut, tassa Meeqqat Illersuisuata kiisalu Meeqqat Pillugit Siunnersuisoqatigiit allattoqarfiannut nuussapput.

Meeqqat Illersuisuat kiisalu Meeqqat Pillugit Siunnersuisoqatigiit pillugit Inatsisatut inatsisaat 2011-mi Ukiuaanerani Ataatsimiinnermi akuersissutigineqarpoq kiisalu 1. marts 2012 atuuttussanngortinneqarluni. Meeqqat pisinnaatitaaffiisigut sullissivik nutaajusoq 2012-ip upernaavani tamakkiisumik pilersinneqareersimassasoq naatsorsuutigineqarpoq.

MIPI'p ilisimasanik katersuivittut sulinera Meeqqat Illersuisuata ataani ingerlaqqissaaq. Ilutigalugulu ilisimasanik katersuivittut sulinerup Meeqqat Illersuisuata ataaniittussaq politikkikkut pituttorsimannginnerulissaaq, kiffaanngissuseqarnerulluni meeqqanut inuusuuttunullu tunngatillugu nutaamik ilisimasassanik ineriartortitsisinnaalissaq.

MIPI'p atortunnaarsinneqarneranut atatillugu MIPI'mi siulersuisut atorunnaassapput. Tamatuminnga suliaqarnerup ataqatigiinnera siumullu samminerunissaa qulakkeerneqarnissaa Meeqqat Siunneruisoqatigiiffiannit ingerlanneqassaaq.

Ilisimasanik katersuinermik suliaqarfiup suliassaa pingaaruteqartoq tassa FN'ip Meeqqat pillugit Isumaqatigiissutaani allassimasunik malinninnissaq sulianillu ingerlareersunit ikorfartorneqarnissaa naatsorsuutigineqarluni, tamannalu pisinnaavoq UNICEF'imik Nakuusamillu suleqateqarnikkut.

Sulinermilu ilaatigut pisariaqassaaq meeqqat inuusuttullu namminneq inuunerminni atukkatik misigisatillu aallaavigalugit oqariartuutaasa meeqqat inuusuttullu atugaasigut ilisimasanik ineriartortitsinermillu nutaanik katersinermi ataqatigiisinneqarnissaat.