Meeqqat Inuunerissut allaffittaarput

Maannamut Meeqqat Inuunerissut atorfeqartitaqarnikuunngilaq, sulisulli tassaasimallutik siulelrsuisut namminneq piumassutsiminnik sulisut aamma MIBB aalajangersimasumik allaffeqarsimanngilaq.

Villum Fondenip suliniummut ’Kuseriarnerup siaruarnera’-nut 10 millioner kroninik tunissuteqarneratigut suliniummi aqutsisumik atorfinitsitsinissaq aalajangersimasumillu allaffeqalersinnaaneq piviusunngortinneqarsinnaasimapput.

Nivép Heilmann, suliniummi aqutsisutut ilisimasanik siaruarterineq, oqaloqatigiinneq aamma sammisaq pillugu oqallitsitsinerit aqqutigalugit Kalaallit Nunaanni meeqqanik kinguaassiuutitigut atornerluisarnerup pinaveersaartinneqarnera, suliniummi ’Kuseriarnerup siaruarnera’-ni anguniagaasup anguneqarnissaa akisussaalluni eqqanaassavaa.

Meeqqanut ambassadørit – inersimasut piumassuseqarluartut, meeqqanik atornerluisarnerup akuerineqarsinnaanngitsuunera pillugu oqallikkusuttut aamma qitiutitsillutik suliaqarumasut ilinniartinneqarnissaasa aaqqissuunneqarnissaa Nivép suliassaasa ilagaat.

Tamakku saniatigut aamma Nivép containerip allaffeqarfiusussap Ilulissap pilersinnissaa suliarissavaa, taassuma, suliniutip ’Kuseriarnerup siaruarnera’-ta ukiuni pingasuni ingerlanneqarnerani, Kalaallit Nunaanni illoqarfiit minnerpaamik qulit tikissavai. Suliassat allat ilaatigut tassaapput suliniut pillugu paasissutissiineq aamma ilisimasalinnik tulluuttunik suleqateqarneq.

- Nivé 2008-mi MIBB-mik pilersitseqataavoq. Katersuineq 2011 ingerlanneqarmat Ilulissani ikiuuppoq, inuttullu pikkorissutut tunniusimasutullu, Kalaallit Nunaanni meeqqanut iluaqutaasumik allanngueqataarusuttutut ilisarisimavarput. Nivép MIBB-mut akoorusunnera suliniummilu Kuseriarnerup siaruarnerani aqutsisoorusunnera nuannaarutigilluinnarpagut, MIBB-mi siulittaasoq Line Frederiksen oqarpoq.

Nivé Heilmann ulluinnarni Forening Grønlandske Børn-p iniutaani Nuummi Sipisaq Avannarleq 3B-mi allaffeqassaaq.