Attartortut sooq anisitaasarpat?

- Isumaqarpunga pingaaruteqartoq pissutsit piviusut aallaavigalugit oqallinnissaq iniminnit assigiinngitsunik ajornartorsiutillit iniminit anisitaasimasut oqallisigineqassappata.

Inuit Ataqatigiit inatsisartunut ilaasortaatitaa Olga P. Berthelsen, naalakkersuisunut apeqquteqaamminik nassuiaavoq.

• Inissianit attartortittakkanit 2010-2011-mut, akiliisinnaagaluarlutik akiliisimannginnertik peqqutigalugu, iniminnit anisitaasut qanoq amerlatigippat?
• Inissianit attartortittakkanit 2010-2011-mut, akiliisinnaassuseqannginnertik peqqutigalugu, iniminnit anisitaasut qanoq amerlatigippat?
• Naalakkersuisut inuit iniminnit anisitaasimasut (arlaannilluunnit peqquteqarpat), qanoq iliuuseqarfigineqarnissaat anguniarlugu, anisitsisarnermi malittarisassanik suliaqarniarpat? Suliarineqassappat qanoq imaqartinniarneqarpa?
• Nuummi angerlarsimaffeqanngitsut ornittagassaat, Naalakkersuisut sapaatit akunneri arlaqanngitsut matuma nalunaaruitigisaat, qaqugu nuummi atulersinneqassava?
• Sinerissami angerlarsimaffeqanngiffiusuni ornittagaqalersinnaanermut, nuummi iliuuserineqartut assigalugit, senerissami arlaanni iliuuseqartoqarniarpa?

Olga P. Berthelsenip apeqqutini ilaatigut makkuninnga tunngavilersorpai:

- Ullumikkut inissiigallartarnermut tunngassuteqartunik aalajangersagaqanngilaq, pinerluttaalisitsinermik inatsisip Kalaallit Nunaanni atuuttumi akiliisitsiniaasartoq - tassa politiit - inisitaasussap anisinneqarnissaanik suliassinneqarneq itigartissinnaavaa, attartortoq attartortulluunniit inoqutai inissaarutivissatillugit pissutsillu allat peqqutigalugit anisitsinissaq akerlerineqarpat.

- Ulluinnarni politiit tamanna maleruagassaq tamatigut atortarsimavaat. INI A/S-ip aamma tamatuma nassatarisaanik anisinneqartut inigigallagassaanik tunisarpai. Neqeroorut tamanna minnerpaamik ilaqutariit immikkut ineeraqarnissamik nassataqartarpoq aammalu imermik kuuinnartumik imeqartuussimassalluni. Inissiat taamatut inigigallagassatut innersuussutigineqartartut, tassaagajuttarput inissat aserfallassimanerpaat ajornerpaallu. Ilaat imak ajortigisimasarlutik, inuinnarnit attartorumaneerussimanertik pissutigalugu inuerussimasarlutik, Olga P. Berthelsen oqarpoq.

- Maleruagassat massakkutut itsillugit pisortat inissiaataani attartortut eqqartuussisutigut illersugaanngillat, inissiamit attartugarisimasaminnit anisitaassagaluarpata, soorlu akiligassaqalersimanertik imaluunniit najugaqartunut allanut akornusersuisimanertik pissutigalugu. Tamatumani saniatigut maleruagassaarunnikuuvoq taartaasumik inissamik tunisinermi qanoq taassumap pitsaatiginissaanik naqissusiissunik.

- Ilisimavara Naalakkersuisut nunatsinni, inuit angerlarsimaffeqanngitsut pillugit misissuinissamik aallartitsinikuusut. Misissuinermi takuneqarsinnaalissagunarpoq angerlarsimaffeqanngitsut kikkuuppat, qanoq atugaqartuuppat, akiliisinnaasimappat, akiliisinnaassuseqarsimanngillat il.il. .

- Taassuma saqqummernissaa pissanganarpoq, angerlarsimaffeqanngitsut pillugit assilissamik piviusorsiornerusumik takusasaqalissagatta, Olga P. Berthelsen oqarpoq.