Ajornartoorfik ima qaangissavarput
Ane Hansen naqissusiivoq, Great Greenlandimit puisit amiinik tunisassiat tuniniarneqarsinnaanngornissaat suli periarfissarsiorlugu
Great Greenland niueqatissarsiorluni sulissuteqartuarsinnarpoq aamma EU'mi taassumalu avataani puisit amiinik tuniniaavinni aallussisunut tamanut puisit amiinik tunisassiat pilerisaarutigalugit.
Taama nalunaarpoq aalisarnermut, piniarnermut nunalerinermullu naalakkersuisoq Ane Hansen, Demokratinit Justus Hansenip apeqqutaanut akissummini.
Justus Hansen ungasinngitsumi apeqqutigaatigaa
- Naalakkersuisut sunik suliniutinik pilersaaruteqarpat atisaliortarfinnut allanullu uagutsitulli puisip amiata atisatut mutinngoqqinnissaanut soqutiginnissinnaasunut puisip amia pilerisaarutiginiarlugu?
Tassunga Ane Hansen ilaatigut akivoq:
- Naalakkersuisut kissaatigaat pingaartumik erseqqissassallugu puisit amiisa tuniniagaanerat pillugu pilersaarutit iliuusissallu puisit amiinik suliffeqarfimmit Great Greenland A/S-imit (GG A/S-imit) suliarineqarsimammata.
- Apeqqutigisatit akissavakka periusissatut pilersaarut GG A/S-ip siulersuisuinit ineriartortinneqarsimasoq tunngavigalugu aamma GG A/S apeqquteqarninnut atatillugu attaveqarfigisimavarput.
Great Greenland ukiunut 2011-miit 2013-imut takorluukkat aamma pingaarnertut periusissatut pingaarnertullu suliassanik pilersitsisimavoq uani erseqqinnerusumik allaaserineqartuni “GG A/S tuniniaanermut atatillugu periusissatut pilersaarutaa 2011-2013” tassunga ilanngullugu:
Tamanut pisariaqartitsisunut puisit ameerniartartutut sallersaanissaq
Suliffeqarfimmiit suliffeqarfimmut (BtB) puisit ameerniartartutut pikkorinnerpaatut inissisimalernissaq (GG A/S takussaasariaqarpoq – naniuminartuulluni – eqqortunik akeqartitsilluni – tuniniaavinni – pitsaanerpaanik pisisitsisinnaasoq)
Tunisassiassat GG-p pisiniartunut neqeroorutigisinnaasaasa pitsanngorsartuarnerisigut
Pisiniartunik attaveqarneq pisiniartunut ataasiakkaanut inummiit inummut pisartussanngorlugu (ilaatigut sinniisuulluni tuniniaasartoq namminerluunniit tuniniaasorisaq aqqutigalugit qanittumik attaveqarnissaq qulakkeerlugu)
Nammineq ateq atorlugu allani tuniniagassanut uninngatitsivinnik tallimanik pilersitsinikkut (ilaatigut pisinianut takussaasuunissap qanittumi attaveqarnikkut qulakkeerneqarneratigut)
Tuniniaanermut akisussaasoq GG A/S-imut atasussanngorlugu
Tuniniaassussisartut immikkut tunitsivissanik ilisimasallit aqqutigalugit tuniniaanikkut
Pisiniat pitsaanerpaamik kiffartuunneqartarnerisigut.
Tuniniaasartutsinnut niuertarfinnullu tuniniagassanik pitsaanerpaanik tunniussisarnissaq
Immikkoortunik aqutsinikkut (pisiassaq eqqortoq, aki eqqortoq, piffissaq eqqortoq, annertussutsit eqqortut)
Uninngasuutinik aqutsinikkut (ilaatigut pisiniartartutta pingaarnerutitatta tamatigut tunisassiornissamut piareersimanissaat isumannaarlugu – nioqqutissanik piumaneqartunik tuniniaanissamut piareersimallutik).
Nioqqutissanik inissiisarnikkut
Sunniiniarnernik aqutsinikkut.
Suleqatigisanut pingaarutilinnut suleqatikkuminartuulluni
Qulakkeerlugu GG A/S tamakkuninnga sulialinni pitsaanerpaanik niuernermut piumasaqaateqarnissaq
Qulakkeerlugu GG A/S puisit amiinik pisiniarfigiumaneqarnerpaassasoq
Kopenhagen Fur-ip saqqummersitsinerinut peqataasarnissaq.
Ilusilersuinermik mutiliornermillu ingerlatitseqqittarnermi ilisimasalittut suliffeqarfiussalluni pikkorissoq
GG A/S ineriartornermik aallartitsisartutut ingerlassaaq, ilaatigut atisalersoriaatsimi puisit amiisa atorneqarnissaat qulakkeerlugu
GG A/S-imi tuniniaaneq nukittorsarlugu.
-GG A/S maannakkut Kopenhagen Fur-imut taassumalu atisalianik ineriartortitsiviinut attaveqarnialerpoq, ineriartortitsineq aamma puisit amiinik erisaanillu atuilluni pisinnaaqqullugu. Taamatuttaaq GG A/S atisanik ilusilersuinermik ilinniarfinnik suleqateqarniarluni attaveqarpoq taamaalillutik taakku puisit amiinik erisaanillu periarfissanik aamma takunnissinnaaniassammata.
Kiisalu Kalaallit Nunaanni sumiiffinni atisanik ilusilersuisartut ilusilersuinermut attaveqaqatigiittarfissaat aallartinneqassaaq, Ane Hansen ilisimatitsivoq.
GG A/S aammattaaq maani nunatsinni tunisat amerlisinniarlugit suliniuteqarpoq:
· Brugsenimi Pisiffimmilu amminik akikitsunik tuniniaanermigut,
· Mersortarfinnut amminik akikitsunik tuniniaanermigut,
· Brugsenimut Pisiffimmullu pooqattanik atortussanillu tuniniaanermigut,
· Qarasaasiakkut pisiniartarfimmik pilersitsinermigut.