Atuartorpassuit ilinnialinngisaannassapput
2010-mi meeqqat atuarfiani soraarummeertut angusaannik namminersorlutik oqartussat kisitsisaataasa takutippaat meeqqat atuarfiat aatsaat taama ajortigisoq
Kalaallit Nunaanni Sulisitsisut peqatigiiffiata meeqqat atuarfiat pitsaanngitsumillu ingerlatsineq "inuiaat ajunaarnersuannik" taavaa, taama allappoq Sermitsiaq.
2010-mi atuartut 850-t kalaallisut, tuluttut, qallunaatut matematikimilu soraarummeerutaat misissorneqarsimapput, paasisallu tupannaqaat.
Nunap immikkoortuani siunnerfilimmik inerisaanissamik pilersaarusiaq pillugu nalunaarusiamit kisitsisit nutaat atuartunik tamanik 2010-mi meeqqat atuarfianit anisunit paasissutissiissutit tamanna takutippaat. Tamanna Sermitsiap tallimanngornermi saqqummiutissavaat.
Atuartut 10 procentii "sanngiitsutut" nalinerneqarput, allat 48 procentit "nalusutut" nalilerneqarlutik. Aamma atuartut arlaqartut meeqqat atuarfiat naammassineq ajorpaat, misissuinermit takuneqarsinnaavoq.
Tamakku ataatsimoortikkaanni imaappoq atuartut pingasuugaangata marlungajaat ilinnialernissaminnut ajornartuussasut, Sermitsiaq allappoq.
Inuiaat ajunaarnersuat
- Inuiaat ajunaarnersuatut tippoq. Tamatta sorpassuarnik anguniagaqarpugut, uuliasiorneq aluminiumillu tunisassiorneq ingerlanneqartussaalluni, ilinniakkatigulli tunngasissat ajorput, GA-p pisortaa Henrik Leth Sermitsiamut oqarpoq.
Taamaalilluni Kalaallit Nunaat meeqqani inuusuttunilu kinguaariit ataatsit suliluunniit inersimasutut inuulerianngitsut amerlanersaannik katataqaqqippoq, aviisi allappoq.
Angusallu appasissusaat SIK-mit aamma kamaatigineqarpoq:
- Tamanna inuiaqatigiittut inooqataaffigisinnaanngilarput. Meeqqat atuarfiata ingerlalluartuunissaa kikkut tamarmik soqutigisaraat, tamanna pingaarutilerujussuuvoq, SIK’p siulittaasua, Jess G. Berthelsen sermitsiamut oqarpoq.
Pissutsit ilungersunarnerat IMAK-imi siulittaasup Sivso Dorphip nassuerutigaa
- Taama amerlatigisut ingerlariaqqissutigisinnaasaminnik ilinniagaqartannginnerat ajunaarnersuuvoq, Sivso Dorph Sermitsiamut oqarpoq.
Isumassat suliniutillu nutaat
Sermitsiarli naapertorlugu naalakkersuisoq akisussaasoq Palle Christiansen nutaanik suliniuteqarpoq.
Inatsisartut upernaakkut ataatsimiinneranni ulluunerani paaqqinnittarfeqarnikkut iluarsaaqqinnermik, meeqqat tamarmik atualernissamut piareersimassutigiligassaannik saqqummiussisoqassaaq. Suliniulli pingaarneq suli meeqqat atuarfianniissaaq, ilinniartitaanermut, ilisimatusarnermut nunanilu avannarlerni suleqatigiinnermut naalakkersuisoq Palle Christiansen Sermitsiamut oqarpoq.
Meeqqalli atuarfiani angusaqarnerlunneq peqqutigalugu GA isumaqarpoq ajornakusuussasoq suliffissat pitsaasut kalaallinit inuttalerneqarsinnaanissaat.
- Atorfiimmi qaffasissumik akissarsiaqarfiusut tamarmik nunanit allaneersunit inuttalerneqassapput. Taamaalillutalu pissutsit ukiut 40-50-it matuma siorna atukkavut uterfigissavavut, GA-p pisortaa Henrik Leth Sermitsiamut oqarpoq.
Meeqqat atuarfiat pillugu Sermitsiaq sukumiinerusumik atuaruk. Aviisi nutaaq aamma uani pisiarisinnaavat: