Immap naqqatigut noqarut isumannaarneqassaaq

Hollandimi entreprenørit suliffeqarfiutaat Visser & Smit Hanab, VSH, isumaqagtigiissusiorfigineqarpoq. Suliffeqarfimmi tassani qillernineq immikkut ilisimasaqarfigineqarpoq ilaatigullu uuliasiornerup iluani taamaattunik suliaqartarluni.

Tele-Postip nuannaarutigaa 2011-mi pisutut sikunik ingerlaartunik ajoqusernissamut noqarutip qajannaarnissaanut suliffeqarfimmik piukkunnartumik suliaqartitsitassaminnik nassaarsinnaagamik. Noqarutip pitsaasumik illersornissaanut aaqqiissutissaq isumannaatsoq tassaavoq itisuumi noqarutip immap naqqata iluanut qajannaarnissaa, Tele-Postimi teknikkimut pisortaq Jørn Jespersen nalunaarpoq.

- Greenland Connect nunatsinnut Tele-Postimullu iluatsitsineruvoq, ukiut pingasut matuma siornagut noqarut atulermalli. Nuannaarugigaa Visser & Smit Hanab isumaqatigiissuteqarfigigatsivu, taamaaliornikkummi noqatut Nuup Kangerluata naqqani itisuumi immap naqqani qaarsumut qillerunneqassaaq, Jørn Jespersen oqarpoq.

Læs "Tele udskyder sikring af søkabel"

35 million koruunit
Suliassaq 35 million koruuninut missingersuusiaavoq apeqqutaalluni qillernissami piffissaliussaq eqquutsinneqassanersoq. Suliaq maajimi aallartissaaq suliffissaq Nuummi Sanap kangerluani sissami pilersinneqassalluni, qillerinerlu namminermi ullut 40-t missaanni sivisussuseqassalluni.

Kingorna noqarut nutaaq noqarummut Greenland Connectimut uiguliunneqassaaq Nuup avataani immap naqqani.

Tele-Postip naatsorsuutigaa suliaq tamarmi ukiamut naammassissasoq.

- Tele-Postip naatsorsuutiginngilaa attaveqaatinik atuisut allannguinerit malugissagaat. Noqarut tamakkiisumik marloqiusaavoq USA-mut Europamullu, taamaattumik nunatsinni atuisut tamarmik tamakkiisumik internetimut, VPN-imut oqarasuaatikkullu attaveqaannassapput allannguinerup nalaani, Tele-Post nalunaarpoq.