Anaananngortussat hashitortarnerat ernumanaq

Naalakkersuisut ikiaroornartumik nunatsinni akiuiniarnermut sutigut pinaveersaartitsinikkut suliniutaasunik annertusaanissamik eqqarsaatersuuteqarpat, Ruth Heilmann Siumut apeqquteqarpoq

Siumut sinnerlugu Inatsisartunut ilaasortaq Ruth Heilmann. Assi: Siumut
  • Naalakkersuisut ikiaroornartumik nunatsinni akiuiniarnermut sutigut pinaveersaartitsinikkut suliniutaasunik annertusaanissamik eqqarsaatersuuteqarpat?
  • Anaanat naartusut hashimik atuisalersimanerat aammalu meeqqat ukiukitsut misiliisalersimanerat annertusiartorneragaasup qanoq Naalakkersuisunit tiguneqarpa, aammalu qanoq iliuuseqarfiginiarneqarpa?
  • 2011-mi ukiakkut imigassaq pillugu Katuami inuppassuarnit peqataaffigineqartumik isumasioqatigiittoqarpoq .Taamanikkut peqataasunit maqaasineqarpoq sumilluunniit ikiaroornartoq eqqartorneqanngimmat, tamanna aappaatigut tupigusuutigineqarpoq, uffa ikiaroornartup nunatsinni atugaanera annertusiartuinnartoq. Killormuanik imigassamik atuineq annikilliartorneragaasoq. Naalakkersuisulli neriorsuutigaa ikiaroornartumik atuineq pillugu taannaannaatillugulu isumasioqatigiittoqarumaartoq tamanna qaqugu piviusunngortinniarneqarpa?

Inatsisartunut ilaasortaq Ruth Heilmann, Siumut apeqqumminik tunngavilersuivoq:

- Qanittukkut tusagassiuutitigut tusartinneqarpugut allaat anaanat naartusut ikiaroornartumik atuisunik ilaqalersimasut, tamanna akueriuminaatsoqaaq iliuuserisammi pinaveersaartitsinikkut naammassimanngitsut uani ersarissorujussuuvoq. Taamatut ingerlasoqalernera akiugassaavoq pisariaqartoq.

- Aammalu meeqqat tupatortut amerliartuinnavippunngooq aammalu ikiaroornartumik misilisalersarput tupamik misiliisalernermik malitseqartumik,taamatut ingerlaaseqalerneq siunissamik kingunipiluttussaavoq inuiaqatigiinnut akisussaqisoq. Tupa nappaatinik malitseqartarmat kræfteqalernermik allatigullu peqqiilliornermik, pingaartumik meeraanermit aallartittoqartalersimanerup kingunerisassi ila aarlerinarluinnarput, Ruth Heilmann aperaaq.

Powered by Labrador CMS