Eqqartuussivik aalajangiingajalerpoq
Nunatsinni Eqqartuussisuunerup Søren Søndergård Hansenip naatsorsuutigaa, Nutaarmiut pillugit suliaq ullumi aqaguluunniit ammasumik matoqqasumilluunniit ingerlanneqassanersoq
Ullaaq manna Nunatta Eqqartuussisuunera Søren Søndergård Hansen, Sermitsiaq.AG'mut oqarpoq naatsorsuutigalugu ullumi aqaguluunniit Nunatta Eqqartuussiviata aalajangissagaa, sisamanngornermi angummik 22-nik ukiulimmit Nutaarmiuneersumik sapaatip akunnerata siuliani Upernaviup eqqartuussiviata illersuisup piumasaqaataa naapertorlugu matoqqasumik killisiuinissamik aalajangiinera pissusissamisoornersoq.
- Nunatta Eqqartuussiviata illersuisoq ataasinngornerup tungaanut oqaaseqaateqarsinnaanera killilerpaa. Tamanna isumaqarpoq ataasinngornermi ulloq naallugu oqaaseqaateqarnissamut periarfissaasoq. Nunatta Eqqartuussiviata qaqugorpiaq aalajangiinissani piffissalinngilaa. Sapaatip akunnerani uani ilaatigut Aasianni suliassat ingerlanneqarnissaat aalajangiunneqareerpoq. Ataasinngorneq ataatsimiinnerit 22.15 marlunngornerlu 19.30 tikillugu ingerlanneqarput. Suliassami uani aalajangiussat suliat allat akornisigut ingerlassaaq.
- Naatsorsuutigaara ullumi aqaguluunniit aalajangiisoqassasoq sulili suna tamarmi nalunarpoq, Søren Søndergård Hansen oqarpoq.
Taassuma erseqqissaatigaa Nunatta Eqqartuussiviata ataasinngornermi aalajangiinissaa kingutinneqanngimmat.
Ataasinngornermi aalajangiisoqarnissaanik politiit ilisimatitsinerat, eqqunngilaq. Sermitsiaq.AG'mi allaaserineqareersoq politimesteqarfimmi pisortaq Claus Risbjerg saaffigaara iluarsiivigeqqullugu. Taanna ilisimatitsivoq illup iluani kukkuluttortoqarneratigut taama paasisitsiisoqarsimasoq, simasoq, Søren Søndergård Hansen nassuiaavoq.
Matut ammarneqassappata kikkunnut tamanut tusarliunneqarsinnaalissaaq 22-nik ukiulik eqqartuussivimmi qanoq nassuiaassimanersoq.
Sapaatip akunnerani uani AG quppernerit qulit atorlugit Nutaarmiuni pisumik allaaserisaqarput. Aviisi qarasaasiannut ivertitassanngorlugu ugguuna pisiarisinnaavat: