Kuupiup uulia pillugu Al Jazeerami oqaasii
Isiginnaartartut millionilippassuit Kuupik Kleistip Kalaallit Nunaanni uuliasiorneq pillugu oqaasii malinnaaffigaat
Arabiamiut tv’ikkut aallakaatitsivissuat pissaaneqaqisup Al Jazeera, sapaatip akunnerata siuliani naalakkersuisut siulittaasuannik Kuupik Kleistimik apersuinini aallakaatippaa.
Aallakaatitassiami aningaasaqarnermut tunngasumi ”Counting the Cost” Kalaallit Nunaanni uulia aamma uuliasiorluni ingerlatsineq sammineqarpoq, naluneqanngitsutut arabiami nunat arlalippaat aningaasarsiornerat uuliamik tunisassiornermit pivoq.
Kuupik Kleistip ilaatigut nassuiaatigaa Kalaallit Nunaat nunarsuarmi nunat allat assigalugit unammillertuusoq suliffeqarfissuarnik nunami misissuinissamut kajumilersitsiniaanermi. Taamaattumillu Kalaallit Nunaata akileraartarnermi periarfissat pitsaanerpaat aamma avatangiisinik illersuiniarnermi piumasaqaatit pitsaanerpaanik atugassaqartitsiniaasoq.
Naalakkersuisut siulittaasuata tikkuarpaa uuliasiorfilioqatigiit nunatsinnukarnissaminnik mianersuuteqartut aningaasatigut akilersinnaannginnissaa annilaanngatigigamikku. Kiisalu Kuupik Kleist nassuiaavoq, Kalallit Nunaat Issittumi uuliasiornissamik qinnuteqarnermut atatillugu Kina’mit saaffigineqarsimanngitsoq.