22-nik ukiulik Nuummut apuuppoq
Ataasinngornermi ullup qeqqata siorna 22-nik ukiulik Nutaarmiuneersoq Nuummut mippoq. Taassuma ilaatigut inuit pingasut toqussimallugit nassuerutigaa
Nal. 10.55 angut 22-nik ukiulik Nutaarmiuneersoq Nuummi Mittarfimmut pivoq.
Ualimut kingusinnerusukkut Nunatta Eqqartuussiviata aalajangissavaa sap. ak. siuliani sisamanngornikkut 22-nik ukiulimmik killisiusoqarmat matut matoqqatinneqarnerat pissusissamisoornersoq, taama Upernavimmi eqqartuussivik aalajangermat illersuisup kissaateqarneratigut. Matunik matoqqatitsisoqarpoq naak politiit isumaqaraluartut kikkut tamarmik soqutigisarigaat paasissallugu 22-nik ukiulik Nutaarmiuneersoq qanoq nassuiaatissaqarnersoq.
Politiit aalajangiussaq Nunatta Eqqartuussivianut ingerlateqqippaa, taakkualu ualimut kingusinnerusukkut aalajangiissapput eqqartuussiviup matut matoqqanissaannik aalajangiussaa atuutsiinnarneqassanersoq.
Matut ammassappata, innuttaasut siullermeerlutik periarfissinneqassapput qanoq 22-nik ukiulik eqqartuussivimmut nassuiaasimanersoq.
22-nik ukiulik inunnik pingasunik toqutsisimasutut inunnillu sisamanik toqutseriarsimasutut unnerluunneqartoq pisuulluni nassuereerpoq.