Toqutsisarnerit amerlanerpaat
2011-mi kisitsisit ilanngunnagit, Kalaallit Nunaanni toqutsisarnerit nunarsuarmi amerlanerpaajupput - innuttaasut amerlassusaat eqqarsaatigalugu
Arnat kinguaariit pingasut - niviarsiaqqamik arfineq-pingasunik ukiulimmik ilallit - Nutaarmiuni toqutaasut ajoraluartumik ileqqumik uppernarsaaginnarput: Kalaallit Nunaanni toqutaasartut amerlasoorujussuupput.
Taama TV-2 nittartakkamini allappoq, United Nations Office on Drugs and Crime, siorna nalunaarusiarineqartoq oktobarimi saqqummersoq innersuussutigalugu.
Kalaallit Nunaat Europami nunanit amerlanerpaat tulliatut toqutsiffiusartoq nalunaarsugaavoq. Danmarkimi inuit 100.000-ugaangata toqutsinerit 0,9 pisarput Kalaallit Nunaanni 10,5 toqutaasarput - Danmarkimit aqqanileriaammik amerlanerit. Taamaalilluni Kalaallit Nunaat Ruslandimut aamma Myanmarimut assersuunneqarsinnaavoq.
Sapaatip akunnerata siuliani pisut eqqaassanngikkaanni Kalaallit Nunaanni toqutsisarneq unikaammigaluarpoq. 2011-mi inuk ataasiinnaq toqunneqarpoq. Ukiuni siuliini toqutsisarneq taamaaginnarluni ukiumut arfineq-pingasut qulingiluallu akornanniipput. Maanna alianartumik pisoqarnerani kisitsisit allanngoqqipput, inuit pingasut toqutaammata - Kalaallit Nunaanni ukioq manna toqutsinerit siullersaat.
Nunarsuaq tamaat isigissagaanni Kalaallit Nunaat imaluunniit Rusland amerlanerpaanik toqutsiffiuneq ajorput. Hondurasimi toqutsisartut amerlanerupput. Tassani inuit 100.000-ugaangata innuttaasunit 82,1 toqunneqartarput.