Carsten Siegstad siulittaasutut qinigaaqqippoq

Aavaat pisarnertut ukiumoortumik ataatsimeersuarluni aallartimmat minutsimik ataatsimik nipaallisimaarneqarpoq, Nutaarmiuni qimagaasut allallu alianartumik pisoqarneranit eqqorneqartut eqqaaniarlurumallugit. Kingorna ataatsimeersuartut Guutiga Illimmi atorpaat.

Taava ataatsimeersuarneq pisarneq naapertorlugu ingerlanneqarpoq, tassani erinarsoqatigiit ilaasortaasa 42-usut siulittaasutut Carsten Siegstad qineqqippaat.

- Tulluussimaarutigaara Aavaami ilaasortat tatigimmannga, sulinngiffeqarfigalu sumut ajunngitsumik atussallugu nalujunnaaqqippara.

Carsten Siegstad, Air Greenlandimi timmisartumi sulisutut atorfeqarpoq, Københavnimi najugaqarluni ukiumulli qaammatini marlussunni nunatsinniittarpoq nunap iluani timmisartuussinerni sulilluni.

Carsten Siegstad 2005'imiilli erinarsoqatigiinnut siulittaasuuvoq. Siulittaasumut tullersortaalerpoq Pavia Høegh. Poul Ringsted aningaaserisutut qinigaaqqippoq, Rissa Buch nutaamik allatsinngorpoq kiisalu Else Marie Herholdt Jensen siulersuisunut ilaasortanngorpoq.

Sisamanngorneq marsip 22-at Aavaat Bella Centrerimi aliikkusersuissaq ICRI 2012 ataatsimeersuarnerata nalaani www.icri2012.dk, ataatsimeersuarnermi peqataasussat nunanit tamalaanit hornorujut arlaqarput. Qaammatit marluk qaangiuppata Aavaat Budapestimi Ungarnimiittumi Etnografisk Museumimi aliikkusersuissapput, aamma nunat avannarliit atuakkanik svenskit aallartitaqarfianni saqqummersitsinermut atatillugu. Angalanissamut aningaasartuutit ikilisarniarlugit erinarsoqatigiinni ilaasortanit 42-nit 24-nnaat peqataassapput.

Aavaat, 2014-imi tullissaanik ICC'p ataatsimeersuarnissaanut qangalili aningaasanik katersilluni aallartereerpoq. Kingullermik Aavaat ICC'p ataatsimeersuarnerani Nuummi peqataavoq, taamani namminneq akilikkatik 175.000.00 kr.-it aningaasartuutigaat.

Pisarnertut ataatsimeersuarneq erinarsoqatigiinnut ukiorpanni ilaasortamit folketingimut ilaasortamit Sara Olsvigimit aqunneqarpoq.