Immikkut ittumik 8 mill. kr.
Tallimanngornermi februaarip qulinganni Great Greenlandimi immikkut ittumik ataatsimeersuarnermi ilaatigut siulersuisut nutaamik ilaasortaqalerput
Immikkut ittumik ataatsimeersuarnermi ingerlatseqatigiiffik 8 mio. koruuninik aningaasaliiffigineqarpoq.
Aningaasaliissuteqarnermut inatsisitigut tunngavigineqarpoq 2011-mut aningaasanut inatsimmiittoq namminersorlutik oqartussat nittartagaanni www.nanoq.gl allassimavoq.
Naalakkersuisut periarfissaq atorsimavaat siulersuisut atorfillit suleqatigalugit ingerlatseqatigiiffimmut ataatsimullu isigalugu piniartutut inuussutissarsiuteqarnermut siunissamut suliassanut pilersaarusioqqullugit, taamaalilluni siunissami ingerlatseqatigiiffimmut aningaasaliisarneq pisariaqartitaajunnaarniassammat.
Peqatigitillugu Naalakkersuisut siulersuisut oqaloqatiginerisigut siulersuisunut ilaasortat taarsernissaat pisariaqartissimavaat. Miki Nicolaisen, Hotel Kulusuk-mik aamma Hotel Ammassalik-mik piginnittoq siulersuisuni ilaasortanngussaaq.
Miki Nicolaisen inuussutissarsiornermik misilittagartuujuvoq piumassuseqqortooq siusinnerusukkullu ilaatigut Kalaallit Nunaanni Takornariaqarnermut Inuussutissarsiornermullu Siunnersuisoqatigiit (ullumikkut Visit Greenland A/S) siulersuisuinut ilaasortaasimalluni. Miki inuusuttunnguullunili Kalaallit Nunaanni hoteliuteqarnermik ingerlatsilerpoq ingerlatseqatigiiffiillu aningaasaqarneq eqqarsaatigalugu ingerlanneqarnerinut tunngasunik misilittagaqarluartuulluni, nittartakkami atuarneqarsinnaavoq.
Bruno Olesen aamma Aaja Chemnitz Larsen siulersuisuni ilaasortaaginnarput. Bruno Olesen siulersuisuni siulittaasussatut toqqagaavoq. Bruno Olesen Royal Greenland A/S-imi nittarsaassinermut pisortaavoq, Great Greenland A/S-ip tuniniaanikkut nittarsaassinikkullu ineriartortinneqarnerata ingerlateqqinnissaannut piginnaasaqarluarluni, namminersorlutik oqartussat naliliipput.
Ilutigalugu siulersunut ilaasortat Amalie Jessen aamma Bent Kragh tunuarput. Amalie Jessen aamma Bent Kragh siulersuisunut qinigaaqqikkumasimanngillat. Aqutsisut, siulersuisut ingerlatseqatigiiffiullu piginnittui paaseqatigalugit siulersuisunut ilaasortatut marluullutik tunuarumasimapput.
Ataatsimeersuarnerup kingornatigut siulersuisunut ilaasortaalissapput:
Bruno Olesen (Formand)
Mike Nicolaisen
Aaja Chemnitz Larsen