Odense Zoo'mi Kalaallit Nunaat
Ukioq manna aammaarluni Odensemi Zoologisk Havemi kalaallit ulloqartinneqarput
Soorlu ukiuni siuliini aaqqissuussineq Kalaallit Illuutaataata aamma Zoologisk Have suleqatigiinnermikkut ullut marluk - arfininngorneq aamma sapaat - ingerlappaat.
Alapernaasertut qimminik qimuttunik qanimut takunissaminnik periarfissinneqarput. Qimmit assigiinngitsut soorlu siberian husky, alaskan malamut aamma soorunami qimuttut nunatsinneersut takussaapput. Meeqqat akiliilaarlutik qimussersinnaapput. Naak Danmarkimi aputeqaraluartoq ima aputeqartiginngilaq qamutit atorneqarsinnaallutik.
Qamutiviit piniutitallit qajarlu saqqummersinneqarput. Tuniniaavinni puisip amiinik aaqqatit umimmaallu qiviuinik nuersakkat ilaatigut pisiassaapput.
Arfininngornermi erinarsoqatigiit Umiaq tusarnaartitsipput. Aqagu sapaammi Rasmus Lyberth erinarsussaaq aamma uaajeertoqassalluni. Tamakku nal. 12.00-15.00'illu akornanni ingerlanneqassapput.