Kalaallit Nunaanni efterskolit marluk suna assigiinngissutigaat
Ruth Heilmann, Siumut Nunatsinni efterskolit pillugit apeqquteqaateqarpoq
Inatsisartunut ilaasortaq Ruth Heilmann, efterskolit pillugit naalakkersuisunut arlalinnik apeqquteqaateqarpoq. Apeqquteqaatinili tunngavilersunngilai.
Siullertut efterskolit pillugit Inatsisartunut nassuiaasisoqarnissaa kissaatigaa. Paaserusuppaa atuartitsinermi suut nelqartitatut pingaartillugit ingerlanneqarnersut. Aamma paaserusullugu efterskolini Qasigiannguani Maniitsumilu ingerlatsineq sutigut assigiissuteqarnersoq.
Ruth Heilmannip aamma apeqqutigaa atuartunik illoqarfimmut akuulersitsineq sutigut angusaqarfiusumik ingerlanneqarnersoq.
Kulturikkut timersornikkullu siuarsaaneq qanoq pingaartinneqartiginersoq Ruth Heilmann aperivoq, soorlu isiginnaartitsinikkut, assassornikkut, nipilersornikkut, erinarsornikkut assigisaatigullu.
Ruth Heilmannip aamma paaserusuppaa efterskolertut inilerinikkut nerisassiornikkut najugaqarfimmilu suliassanut akuutitaatigisoqartarnersoq.
Kiisalu naggataatigut Ruth Heilmannimit ujartorneqarpoq efterskolertut atuarnerminnik unititsiinnartartut maannamut suna pillugu uniinnartoqartarnera nalunaarsukkamik takussutissaqartinneqarnersoq.
Tassunga tunngatillugu oqaatigisariaqarpoq ukiumut atuarfiusumut 2011/12 efterskolerusullutik soqutiginninnittut amerlaqimmata:
Atuartut 593-it ukiumi atuarfiusumi 2011/12 Kalaallit Nunaanni Danmarkimilu efterskolerniarlutik qinnuteqarput.
Ukiup atuarfiusup aallartinnerani ima agguataarsimallutik:
Danmark: 288
Maniitsoq: 156
Villads Villadsen: 149
Naatsorsuutigineqarpoq Danmarkimi efterskolerusuttut 250-it tapiiffigineqarsinnaassasut. Maniitsumi efterskolimi 70-it atualernissaat akuerineqarput 86-it itigartinneqarput utaqqisunulluunniit inissinneqarlutik. Villads Villadsenimi 86-t atualerput 63-it itigartinneqarput utaqqisunulluunniit inissinneqarlutik.
Tamanna isumaqarpoq efterskolini nunatsinni danskillu efterskoliini atualersut 406-iusut namminersorlutik oqartussanit taperneqarlutik. Illuatungaanni ajoraluartumik Nunatsinni efterskolerniarlutik qinnuteqartut 149-t akuerineqanngitsoortut efterskolini marluusuni inissat killeqarneri pissutigalugit. Tamanna nanoq.gl'imi takuneqarsinnaavoq.