- GU-mi imigassartoqqusinnginneq naapertuilluannginneruvoq
Siumumeersup Kristian Jeremiassenip Aasianni ilinniarnertuunngorniarfimmi imigassartoqqusinnginneq iluarinngilaa
Aasianni GU-imi imigassanik aalakoornartortalinnik eqqusseqqusinnginnermut atorunnaarsitsinissamut Naalakkersuisunut ilaasortaq akuliunniarpa?
Siumut sinnerlugu Inatsisartunut ilaasortaq Kristian Jeremiassen paragraf 37 naapertorlugu taamatut apeqquteqarpoq.
Taassuma apeqqutini imatut tunngavilersorpaa:
- Isumaqarpunga 18-inik ukioqalereersimasut inuusuttut pisinnaatitaaffiinik arsaartorneqarnerat ingasappallaartoq. 18-inik ukioqalereersimangaanni imigassanik aalakoornartulinnik pisisoqarsinnaavoq, taamaammat paasisinnaanngilara Aasianni GU-imi ilinniartut 18-leereersimasut inigisaminnut imigassamik aalakoornartortalimmik eqqusisinnaannginnerat.
- Paasisinnaavara 18-liineqanngitsut imigassanik aalakoornartortalinnik eqqusisinnaasimanngippata inigisaminnut, 18-inimmi ukioqalersimanngitsut imigassanik aalakoornartunik pisinissaat sassaallerfigineqannginnissaallu inerteqqutaavoq, Kristian Jeremiassen oqarpoq.
- Inersimasutut ukioqalereersimasut isumaqarpunga inigisaminni imigassanik aalakoornartortalinnik peqarsinnaasut.
- Taamaattorli ataqqivara GU Aasiaat aaliangersimappat kollegiet imerfiussanngitsut taamaattorli paasisinnaanngilara pisinnaatitaaffiiaanertullu isigalugu 18-leereersimasut inigisaminni akilikkaminni imigassanik aalakoornartortalinnik eqqusseqqusaannginnerat.
- Isumaqarpunga Naalakkersuisunut ilaasortaq akuliuttariaqartoq inuusuttut inuunermi misilittaanerup silarsuaani aqqusaarisut 18-leereersimasut imigassamik aalakoornartulimmik inigisaminniinnissaat periarfisseqqullugu, Kristian Jeremiassen nassuiaavoq.
- Isumaqarpungalu GU kollegie-ni aalakoortoqassanngippat Aasianni GU-ip tamanna nammineq aaliangertariaqaraa, ataqqissavaralu.