AWG'imut unammiartortussat piareerluinnarput

Sisimiuni sapaatip akunneranik sungiusareerlutik sisoraatinik oqilaniuttartut unammiartornissaminnut piareerluinnarput

Sisoraatinik oqilaniuttartut Sisimiuni ullaaralaakkut makillutik sungiusarput. Assimi sisorartartut illuat immikkuullarilluinnartoq nunatsinnit qammasissianit sanaaq. Assi: Nammineq pigisaq

- Sapaatip akunnera siulia tamaat nuna tamakkerlugu sungiusaasup Erik Amondsenip, sisoraatinik oqilaniuttartut katersorpai Arctic Winter Games Canadami qaammat tulleq ingerlanneqannginnera sioqqullugu.

- Sungiusaqatigiinnerput pitsaavoq. Akissarsiutigalugu timersortartutut inuunerup assinga misilipparput. SSP-ip illuutaani tusaamasami najugaqarpugut, silamut anillakkutta illerngit allornialuinnaat atorlugit tikissinnaallugit, Erik Amondsen nuannaaqisoq oqarpoq.

- Ullut arfineq-marluk ingerlaneranni 16-eriarluta sungiusarpugut. Katillugu 20 tiimit sunniuteqarluartumik sungiusarluta. Marloriarluta unammivugut, akuttussuseriikkaanik sungiusarluta aammalu sukkatsinnartunik sungiusaateqarluta. Oqartoqarsinnaavoq sakkortuumik sungiusartoqartoq, pitsassuarmilli.

- Maannakkut Canadami AWG'mi peqataasussat piareerluinnarput. Soorunami anguniarparput Kalaallit Nunaat ujaminnassasoq. Tamatumuuna AWG'mi peqataanissatsinni sisoraatinik pujassaasartumik ilaqassaagut. Pujassaasussaq tassaavoq Siverth Hansen, taava tamarmik sisoraatiginnissaat ernumanarpallaanngilaq, Erik Amondsen oqarpoq.

Kalaallit Nunaata Arctic Winter Games'inut peqataatitassai makkuupput: Aka Olsen, Nunni Petersen, Ninni Jerimiassen, Malou Platou Johansen, Salik Olsen, Nukappiannguaq Olsen, Pakkutaq Hansen, Pipaluk Kristensen, Camilla Lynge Hansen, Angutitsiaq Lynge, Aqqalu Frederiksen aamma Anguteeraq Kleist.


Powered by Labrador CMS