Imeruersaatit eqeersaatitallit GIF'imit inerteqqutaalerlik
Kalaallit Nunaanni Timersoqatigiit Kattuffiata nuannaarutigaa imeruersaatit eqeersaatitallit tuniniarneqarneri killilersorneqarmat inerteqqutaalernissaalli takorusunnerugaluarpaat
Kalaallit Nunaanni Timersoqatigiit Kattuffiata naammagisimaarlugu paasisimavaa Kommuneqarfik Sermersooq, GA (Sulisitsisut Kattuffiat) aamma CSR Greenland isumaqatigiissute-qarsimasut imigassat eqeersaatitnik taaneqartartut (Cult aamma Red Bull) meeqqanut atuartunut tuniniagaaneri killilersulerniarlugit, GIF'ip siulittaasua Nuka Kleemann tusagassiivinnut allappoq.
- KNR naapertorlugu isumaqatigiissutilli taamaallaat niuvertarfinnut Nuummi ikittuinnarnut aammalu niuvertarfinnut ataasiakkaanut Ilulissani aamma Uummannami atuutsinneqarluni, Nuka Kleemann oqarpoq.
- Kalaallit Nunaanni Timersoqatigiit Kattuffiata isumalluarfigaa tamatumunnga inatsisiliorniarnermut suliniarneq, tamannami aallartisarneqarsimammat ingerlanniarneqarlunilu Inatsisartut upernaakkut 2011-mi ataatsimiinneranni, aalajangersaasoqarneratigullu, tassani imigassat eqeersaatitallit meeqqanut inuusuttunullu 18-it inorlugit ukiulinnut malittarisassiuunneqarniarmata, Nuka Kleemann naliliivoq.
Imigassani eqeersaatilinni akugisat amerlaqaat ajorluinnartumillu kinguneqartitsisinnaasunik, taakkua annertuumik imersimagaanni. Akuisa ulorianassusiat atuarneqarsinnaavoq Namminersortut peqqinnissaq pillugu nittartagaanni; takuuk www.peqqik.gl
Imigassat eqeersaatitallit kingunerisinnaavaat isumaliortaatsip artorsaateqalernera aamma eqqaarsartaatsikkut innarlerneqarneq, aammalu timimut ajortunik sunniuteqarsinnaalluni pingaartumik meeqqanut inuusutunullu. Tamanna tamaallaat atuarnerup nalaani pineq ajorpoq kisianni aamma meeqqat inuusuttullu timersornerisa nalaanni.
- Timersoqatigiit Kattuffiata imigassanik eqeersaatitalinnik imertarneq ajornartorsiutitut annertuutut isigivaa angajoqqaallu kajumissarlugit ajornartorsiut maluginiartaqqullugu, tassami timersorneq eqeersaatilinnillu imergassartorneq imminnut ataqatigiinngimmat, naqissusiivoq Nuka Kleemann.