Tamarmik ilaqutariipput

Kalaallit Nunaanni naalakkersuinikkut sinniisut Nutaarmiunut tikeraarnissamik eqqarsaatersortut, Qaasuitsup Kommuniani borgmesteri ilisimatitsivoq. Jess Svane oqaluttuarpoq nunaqarfimmi eqqugaassut tamarmik imminnut ilaqutariittut

Qaasuitsup Kommuniani borgmester Jess Svane: - Oqaasissakka amigarput. Qaqutigorujussuaq taama alianartigisumik pisoqartarpoq. Taamaattumik aamma pingaaruteqarpoq suut tamaasa atorlugit ikiuunniarnissarput. Assi: Leiff Josefsen

Qaasuitsup Kommuniani borgmester, Jess Svane ulloq unnuarlu kingulleq Nutaarmiuni alianartumik pisoqarneranut suliniutissanik pilersaarusiorluni ulapputeqarpoq.

Pisumit sakkortuumik eqqorneqarpoq.

- Nunaqarfimmi innuttaasut eqqarsaatitsinniipput. Alianartumik pisoqarnera nunaqarfimmi sakkortuumik sunniuteqarpoq. Nutaarmiuni inuit 40-t sinnilaarlugit kisimik najugaqarput, taamaattumillu tamangajammik arlaatigut imminnut ilaqutariillutik. Nunaqarfiup eqqaani nunaqarfinni allani aamma arlalippassuarnik ilaqutaqarput, taamaattumik pisoq Upernaviup eqqaani sunniuteqartorujussuuvoq, Jess Svane oqarpoq.

Pisoq pillugu qanoq oqaasissaqarpit?

- Oqaasissaaleqivunga. Qaqutigorsuaq taama sakkortutigisunik pisoqartarpoq. Taamaattumik pingaaruteqarpoq suut tamaasa atorlugit ikiuunnissarput, Jess Svane akivoq.

Borgmesteri naapertorlugu ulluni qaninnerni aalajangerneqassaaq Kalaallit Nunaata avammut sinniisaanik Nutaarmiunut aallartitsisoqassanersoq. Misiginneqatiginninnermik takutitsiniarluta aammalu ersersinniarlugu nunatsinni inuit pisoq pillugu tamarmik aliasoqataanerat.

Anthon Frederiksen (Nunamut namminermut naalakkersuisoq aaq.) aamma Kuupik Kleistilu immitsinnut attavigiillattaaginnaavippugut.

Nunaqafik kommunefogedeqanngilaq – taamaassimagaluarpat allatut pisoqarsimassagaluarnerluni?

- Apeqqut politikkertaqarpallaarpoq maannakkullu tamanna oqallisigissallugu pissusissamisuunngilaq. Soorunami sillimaniarneq eqqarsaatigalugu siunissami tamanna oqallisigineqartariaqarpoq, Jess Svane akivoq.

Alianartumik pisoqarneranut suna tunuliaqutaanersoq paasisaqarfigaajuk?

- Naagga, ilisimasaqanngilanga. Toqutsinermik misissuineq politiit suliaraat.

Ullaap tungaani Qaasuitsup nittartagaatigut misiginneqatiginnissummik allagaq saqqummiunneqarpoq Jess Svanemit Kuupik Kleistimillu atsiukkamik. Allakkami nunaqarfimmiunut qamannga pisumik misiginneqataanertik ersersinniarpaat.

- Pisimasoq quarsaarutigeqaarput qularutiginngilarpullu pisimasoq nunaqqataasunut eqqaaniittunullu annertuumik sunniuteqassasoq. Manna aqqutigalugu qimagaasunut, ilaqutaasunut nunaqqataasunullu misiginneqatiginninnerput apuukkusupparput. Nalussanngilarsi eqqarsaatitsigut najoratsigit, piffissamilu aggersumi nukissaqartitaanissassinnik kissaallusi, Jess Svane aamma Kuupik Kleist nunaqarfimmiunut saaffiginnillutik allappoq.

Allagaat ima nangippoq:

- Ilisimatinneqarpugut nunaqarfinni peqqinnissamik sullissisut Nutaarmiut eqqaanniittut innuttaasunut pisumut tunngatillugu oqaloqateqarnissaminnik atorfissaqartitsisunut ammassasut. Aamma ilisimatinneqarpugut Tasiusami ajoqi, Upernavimmi palasi kiisalu Qaasuitsup Kommuniani Isumaginninnermut Aqutsisoqarfimmiit orniguttut periarfissaq siulleq atorlugu Nutaarmiunut ingerlassasut. Tupaqqanerup aliasunnerullu nalaanni taakku ikiuuttunut ilaassallutik.

Qaatsuitsup Kommuniata telefonikkut attavissat innuttaasut sianerfigisinnaasaat marluk saqqummiuppaat tassaasut:

59 74 35 aamma 58 56 93

Powered by Labrador CMS