Pisariaqartitsineq nukingernarpoq

- Eqqugaasut qimataasullu qamannga pisumik misiginneqatigaakka. Tamavitta misiginneqatigaassi, folketingimut ilaasortaq Doris Jakobsen, Siumut, oqarpoq.

Kommunefogedit atugaat ullumi KNR-p sammivai. Tamanna Doris Jakobsenip sakkortuumik sorsuutigisimavaa.

Ammaanersiorluni oqalugiarnermini aningaasanullu inatsit pillugu oqalugiarnermini Doris Jakobsenip kommunefogedit atugaat Folketingimut saqqummiuttarsimavai.

Aamma Aningaasaqarnermut ministerimut Bjarne Corydonimut oktobarimi allakkamini Inatsisinillu atortitsinermut ministerimut Morten Bødskovimut kommunefogedit atugaat saqqummiussimavai. Inatsisinillu atortitsinermut ministerip Doris Jakobsen neriorsorsimavaa EU-mi siulittaasuunerup kingorna Kalaallit Nunaannut angalanermini pissutsit nammineerluni takuniarniarlugit.

- Nutaarmiuni pisup alianartup takutippaa kommunefogedit atugaasa pitsanngorsarnissaannut kommunefogedinillu amerlanerusunik atorfinititsinissamut pisariaqartitsineq nukingernartoq, Doris Jakobsen oqarpoq.

KNR malillugu Nutaarmiut kommunefogedeqanngisaannarsimavoq, nunaqarfillu aamma kommunefogedeqartussatut naatsorsuunneqanngilaq. Nunaqarfilli kommunefogedeqassagaluarpalluunniit qinnuteqartunut pilerinarunanngilaq, tassa akissarsiat atugassarisallu ullutsinnut naapertuutinngimmata.

- Kommunefogedeqarneq alianartut taamaattut pinngitsoornissaannut qulakkeerinninngilaq. Soorunami ilisimasinnaanngilarput Nutaarmiuni kommunefogedeqartuuppat taanna allaanerutitsisimasinnaassagaluarnersoq. Nalunngilarpulli nunami sumi tamaani kommunefogedit ullut tamaasa suliamikkut nunaqarfinni ataasiakkaani assigiinngissuteqartitsisut. Taamaattumik kommunefogedit atugassarisaat sapinngisamik sukkanerpaamik pitsanngorsarniassavagut, Doris Jakobsen oqarpoq, taassumalu kommunefogedit atugarisaat pillugit inatsisinik atortitsinermut ministeri sukkanerpaamik oqaloqatiginiarpaa.