Kristian Heilmannip arnaa kalaaleq meeqqat pinngitsaalisamik aallartitat 22-it ilagisimavaat

Arni toqutaammat pinerlunniartartunngorpoq. Taamatut oqaluttuussimavaa affarmik qatanngunni arnaq, Maniitsumi najugalik

Perorsaasumik toqutsisuusorineqartoq politiit tigusaraat. Østjyllands Politi Ritzaumut uppernarsarpaat perorsaasumik 46-nik ukiulimmik Judy Meiniche Simonsenimik toqutsisuusorineqartoq tigusarisimallugu. Tigusarinninneq pivoq Randersip avaataani sisamanngormat ullaap tungaani nalunaaqutaq 10 sioqqutilaarlugu sivikitsumik biilinik malersuinerup kingorna, toqutsisutut pasisaq 39-nik ukiulik Kristian Heilmann politiinit qimaariaraluarmat. Aqquserngup sinaani orpimmut aporpoq imalu aqqunartitertigaluni Aarhus Sygehusimi traumecenterimi unitsitaasimalluni. Oqaatigineqanngilaq inuunera ulorianartorsiorneroq. Ernst van Norde/POLFOTO

Nuka Jørgensen

sisamanng 09. uki 2012 11:07

Annonse

Østjyllandimi politiit ullumi 39-inik ukiulik Kristian Heilmann tigusaraat, taannalu perorsaasumik arnamik 46-nik ukiulimmik Judy Meiniche Simonsenimik toqutsisimasutut pasineqarpoq. Tigusarinninneq pivoq ullaaq biilinik malersuinerup kingorna, tamatumani pasineqartoq aqqunarluni.

Taamatut ullumi allappoq eb.dk.

- Kristiap ukioqqortusereerluni aatsaat anaanarput toqutaasimasoq ilisimalerpaa. Naluara tamanna qangarpiaq pinersoq, oqaluttuussimavaangali tamanna tusaramiuk susinnaajunaavissimalluni, Hanne Heilmann Ekstra Bladetimut oqaluttuarpoq.

Arnaat qallunaat politikkiannit eqqugaasimavoq. Taanna kalaallit meeqqat 22-it, 1951-imi isumaginninnermik misileraanikkut pinngitsaalisamik Danmarkimut aallartinneqartut ilagisimavaat. Tamakkua kalaallit meerartaanni nuimanerit ilagisussaasimavaat, qallunaat malittarisassaat, kulturiat, inooqatigiinnerat, oqaasii atuartitsinerallu ilinniassallugit.

Suliniut sorpassuartigut kukkuneqarsimasoq, qallunaallu oqaluttuarisaaneranni kanngunarsaataasoq.

Aamma Kristian Heilmannip arnaa Sofie Heilmann, taanna Kalaallit Nunaannut utereerluni Danmarkimu uteqqissimalluni, illoqarfinni arlalinni nooqattaarluni angutinillu assigiinngitsunik tallimanik qitornartaarluni. Naggataatigut atornerluisunngorsimavoq.

- Tine Bryldip ukiut marlorpiaat matuma siornatigut attaveqaqatigiilersippaatigut. Immitsinnut naapinngisaannarpugut, taamaallaalli Facebook-ikkut allakkatigullu attaveqartarluta, Hanne Heilmann oqaluttuarpoq.

Taamaassumik taassuma Kristian Heilmannip inuunera ilisimasaqarfigerpianngilaa.

- Nalunngilara ukiukitsuulluni børnehjemmimut pisimasoq kingornalu ilaqutariinni paarineqalersimalluni. Malugisinnaasoraara tamanna ingerlalluarsimanngitsoq, Hanne Heilmann Ekstra Bladetimut oqaluttuarpoq.

Kristian affarmik qatanngumminut arnamut allassimavoq "piumassuseqarluaqqilerluni qularutiginagulu pinerlunneq qaangersimallugu".

- Taamaattumik tupannaqaaq tusarlugu ujaarineqartoq toqutsisimasutullu pasineqartoq, Hanne Heilmann oqarpoq.