Nunaqarfimmi ikiligaasut Danmark-ilaanneqarput
Annertuumik ikilerneqarsimasut timmisartumik Københavniliaanneqassapput. Ikilerneqartup aappaa politiinit apersorneqarsimavoq
Nunaqarfimmi Nutaarmiuni ippassaq alianaqisumik pisoqarnerani inuit marluk annertuumik ikilerneqartut, Nuummi Dronning Ingridip Napparsimmavianiit piaarnerpaamik Københavnimi Rigshospitalimut katsorsarneqariartussapput.
Politiit taamatut nalunaarput.
Ikilerneqartup aappaa suli peruluttupilussuuvoq.
- Taanna pillugu paasissutissat kingulliit aatsaat tiguakka. Ajoraluartumik perulukkunnaartutut suli oqaatigineqarsinnaanngilaq, politimestereqarfimmi allaffissornikkut pisortaq, Claus Risbjerg Sermitisiaq.ag-mut taamatut nalunaarpoq.
Ikilerneqartup aappaa pitsaanerorpasippoq. Paasissutissiisunilli allanit tusarparput, taassuma timaata illuatungaa nukillaarsimasoq, tamannali uppernarsarneqanngilaq.
- Taanna apersorsinnaasimavarput, oqaluttuarisaanillu qanoq pisoqarsimaneranik paasisaqarnerulluta, Claus Risbjerg oqarpoq.
Tigusarineqartoq 20-nik ukiulik, ullumi ullaap tungaa tunngaviusumik inatsisit naapertorlugit Upernavimmi killisiorneqarpoq. Taassuma pasineqarnini qanoq isumaqarfigineeraa nassuiaateqarusunnersorlu suli nalunaarutigineqanngilaq.