Nive'p nuussiaa nunani allani
Nive Nielsenip nuuteeraliaqqaava Danmarkimi Skandinaviallu sinnerani apriilip qulinganni saqqummissaaq. Tyskland tullinnguukkumaarpoq
2009'mi Nive Nielsen & The Deer Childrenip nuuteeraliaqqaataat, ”Nive Sings”, Kalaallit Nunaanni saqqummerpoq, tamatuma kingorna nuuteeraq kusanartunik nalilerneqartarpoq nunanilu tamalaani maluginiarneqarluni.
Maannakkut nuuteeraq saqqummersinneqaqqilerpoq Playground Music aqqutigalugu, taamaaliornikkut Skandinaviami nuannarinnittut nuuteeqqamik tusarnaarsinnaalissapput.
Ukulelemik nipilersortarnerup immikkuullarissutiginerata saniatigut Nive Nielsenip suleqataasalu inuit siutaasa tusaarusutaannik suliniuteqarput. Nive Nielsenip suleqatigilermagit John Parish PJ Harvey'ip saqqummersitaanik arlalinnik suliaqarnikoq aammalu Ralph Carney, Tom Waits'imut sullissinikuusoq, gaffa.dk allappoq.
Nuuteeraq Danmarkimi Skandinaviallu sinnerani apriilip qulinganni saqqummissaaq. Skandinaviap killeqarfiisa ungataanni aamma saqqummissalluni Tysklandimi Glitterhouse Recordsikkut.
”Nive Sings” saqqummersinneqarpoq Nive Nielsenip nammineq saqqummersitsisarfiatigut, Gaffap naliliisartuinit nuuteeraq ullorissanik arfinilinnit sisamanik ulloriannatsinneqarpoq aamma taallat erinallu nersualaarneqarlutik.
Gaffap naliliinera uani atuaruk