Simon: ilumoorsinnaanngilaq

Kommune Kujalleq borgmesteri , Simon Simonsen, isorliunerusuni attaveqaateqarnerup akisunerujussua naammagittaalliutigaa

Kommune Kujallermi borgmesteri, Simon Simonsen, attaveqaatit akisuut naammaginngilluinnarpai. Assi: Ludvig Siegstad

- 2012-imi 120.000 – 140.000 kr.-inik aningaasaleeqqaartigani oqarasuaatitaarsinnaanngikkaanni taava avinngarusimanerusuni suliffeqarfimmik ingerlatsinineq ajornarluinnalissaaq

Taama Kommune Kujallermi borgmesteri Simon Simonsen, naliliivoq.

Taama ineqarnermut, attaveqatigiinnermut angallannermullu naalakkersuisup Jens. B. Frederiksenip akissutaa pillugu borgmester Simon Simonsen oqarpoq

Naalakkersuisup akissummini Kommune Kujallermi Inuussutissarsiornermut Ataatsimiititaliamut tikkuarpaa kujataani suliffeqarfiutilik oqarasuaammut attaveerutsinneqarsimasoq aammalu suliffeqarfimminik ingerlatitseqqissinnaajumalluni savaatillit allat assigalugit VSAT-mut attavilerneqarsinnaanngitsoq ikiorsinnaanngikkini.

- WLL-ikkut attaveqaatit taartissaannik savaatillit VSAT-ikkut attavilerneqarnissaat taamalu avammut attaveqaannarnissaat soorunami pissusissamisuuginnartut naammaginartutullu isigaarput. Sumiiffinnilu taakkunani suliffeqarfiit pioreersut allatulli pineqannginnerat naammaginanngilluinnarpoq, borgmester Simon Simonsen oqarpoq.

- Atugassarititaasut qassiit pissutigalugit avinngarusimasuni suliffeqarfinni ingerlatsiniarneq ajornarnerulersimavoq” borgmester nangippoq kiisalu suliffeqarfiup akuerisanngortinneqarnissaanut aningaasartuutit qaffanneqarsimanerat, nukissiornermut allanullu akit qaffakkiartornerat tikkuarlugit.

- Taamaammat Naalakkersuisunut ilaasortaq inatsisip isumaliutigeqqinneqarnissaannik kajumissaarneqarpoq, borgmesteri naggasiivoq.

Powered by Labrador CMS