Periarfissavut atorluassavagut

- Inuit Ataqatigiinniit nuannaarutigaarput naalakkersuinikkut suliaqartut allat aamma aatsitassarsiorneq pillugu oqallinnermut pisariaqartumut peqataalermata. Innuttaasullu pimoorussillutik oqalliseqataanerat nuannaarutigeqaarput.

Taama nipeqarpoq Inuit Ataqatigiinnit Aqqaluaq B. Egedep Naaja Nathanielsenillu nalunaarutaat.

- Inuit Ataqatigiit isumaqarpugut naalakkersuinikkut isummernivut anguniakkavullu imminut ineriartortittuartariaqartut imminut kukkunersuinertalimmik iseqarluni. Taamaattumik arlaanik siunnersuuteqartoqaraangat tamanna ammaffigiuarparput.

- Aatsitassanut inatsit atuuttussanngortinneqarmat, inatsisartut tamarluinnarmik inatsimmik akuersaarput. Tamassumalu kingorna piffinni assigiinngitsuni inatsisip pitsanngornissaa siunertaralugu Inuit Ataqatigiinniit saqqummiussisarpugut. Tamanna takuneqarsinnaavoq Qoornumit nalunaarummi, Inuit Ataqatigiit ataatsimeersuarneranni aamma inatsisartut nalingissaasumik ataatsimiinnerini.

Pitsanngorsaatissatut siunnersuutit
- Inuit Ataqatigiit inatsisartuni ilaasortaatitaat aatsitassamik inatsit oqallisigisaqaat, taamaattumillu Inuit Ataqatigiinniit aatsitassarsiornermut anguniakkatta pillugit pitsannguutissat inatsimmullu allannguutissanik ersarissunik aamma siunnersuuteqarluta. Siunnertsuutivut innuttaasunut naalakkersuinikkullu suliaqartunut allanut oqallisigisassanngortikkusuppavut.

- Inuit Ataqatigiit inatsisartuni ilaasortaatitaat aatsitassamik inatsit oqallisigisaqaat, taamaattumillu Inuit Ataqatigiinniit aatsitassarsiornermut anguniakkatta pillugit pitsannguutissat inatsimmullu allannguutissanik ersarissunik aamma siunnersuuteqarluta. Siunnertsuutivut innuttaasunut naalakkersuinikkullu suliaqartunut allanut oqallisigisassanngortikkusuppavut. Siunnersuutigaarput qangaanerusoq ileqquusoq assilikannerlugu iliuuseqartoqassasoq, tassa Aatsitassarsiornermut Siunnersuisooqatigiit suleriaasiannut assingukannersumik pilersitsisoqassasoq. Taamaaliornikkut aalajangiiffissani pingaaruteqartuni inatsisartut ilanngunneqarsinnaassapput, tamannalu pissalluni pissaanerup pingasuinnut avinneqarnera innarlinngikkaluarlugu, Aqqaluaq B. Egede aamma Naaja Nathanielsen oqarput.

Tusarniaatitsisarnerit aamma pitsaanerusariaqarput
- Tusarniaanerit ingerlanneqartarnerat eqqarsaatigalugu allannguutissanik siunnersuutissaqarpugut. Innuttaasut aalajangiinerni peqataatinneqarnissaat pingaartutut isigaarput, aatsitassarsiornermi innuttaasut tapersersuinerat tatiginninnerallu ingerlatiinnarneqassappat. Taamaattumik malittarisassat misissoqqissaarneqassapput, innuttaasut paasissutissanik pisarsisinnaanisssaat qulakkeerniarlugu. Tusarniaanerit innuttaasullu peqataatinnissaannik periuusissanik pilersitsinissaq tikinniarparput.

- Uani eqqarsaatit aamma ilagivaat tusarniaanerit ingerlatereerneqarneranniit aatsitassarsiorsinnaanissamik akuersissutisinerup tungaanut piffissamik naammaginartumik oqallinissamut eqqarsaqqissaarnissamullu periarfissiisoqassasoq. Eqqarsaatigineqaqqittariaqarsoraarput ilumut qinnuteqartut tassaassasut tusarniaanernik innuttaasunillu ataatsimiisitsinernik ingerlatsisussat, imaluunniit kikkunnulluunniit attuumassuteqanngitsunik tamakku ingerlanneqartassanersut, Aqqaluaq B. Egede aamma Naaja Nathanielsen oqarput.

- Isumaqarpugut tusarniaanerit innuttaasunillu ataatsimiisitsineerit innuttaasut ilisimasaat tunngavigalugit ingerlanneqartassasut, tamat oqartussaanerallu tunngavigalugu ingerlanneqartassallutik.

- Derudover mener vi også, at man må overveje, om det fremover skal være selskaberne selv, der afvikler borgermøder og lignende, eller om denne opgave skal lægges ud til en uvildig instans. Høringer og borgermøder skal foregå under demokratisk kontrol og i øjenhøjde.

- Pingajussaattut siunnersuutiginiarparput maalaaruteqarsinnaanermik periarfissat inatsimmut ilanngunneqassasut, taamatullu maalaaruteqarsinnaaneq innuttaasunut ataasiakkaanut suliniaqatigiiffinnullu periarfissaassasoq, Aqqaluaq B. Egede aamma Naaja Nathanielsen oqarput.

London Mining
- London Mining pillugu oqallinneq paasiisinnaalluarparput, paasisinnaalluarparput ernummateqartoqarmat. Erseqqissatariaqarparpullu Inuit Ataqqatigiinnut pingaaruteqarluinnarmat innuttaasunut aatsitassarsiornerup aningaasarsiornikkut annerpaamik iluaqutaanissaa. Ernummateqartoqarnerata ersersippaa Namminersorlutik Oqartussat naalakkersuinikkullu suliaqartut aatsitassarsiornissat allallu suliarujussuit pillugit innuttaasunik paasissutissiinerunissaannik, soorlu aamma taariikkat innuttaasunut kingunerisassaanik paasissutissiinerusarnissap pisariaqarnera ernummateqarnerup ersersikkaa.

- Erseqqissarusupparput akileraartarnermut malittariassat ullustinni atuuttut naapertorlugit Nunarput London Miningip saviminissamik piiaaniarneraniit 15-20 miiliaardillu akornanni iseritassaqartussaammat, tassa pilersaarut piviusunngussagaluarpat.

Nunarpulli tutsuiginassutsiminik annaasaqartussaassaaq suliat tamakku aallartitsinnagilluunniit akileraarusersuinerit nutaat pilersaarutigilerutsigit. Kinami 11 milliardinik attartorsinnaassammat, pilersaarutaasut inatsisitigut sinaakutassaat anori naapertorlugu aalajangersorneqassappata?

Piiaasinnaanermut qinnuteqaammik tigusaqanngillat
- Aamma erseqqissartariaqarpoq Namminersorlutik Oqartussat piianissamik akuersissummik qinnuteqammik suli tigusaqanngimmata, taassumallu tigoreernerani ukiup ataatsip sivisunerusulluunniit ingerlanerani aatsaat suliaq naammassineqassammat. Tamakku eqqarsaaatigigaanni Isukasia pillugu oqallinnissaq suli periarfissaqarluarpoq. Inuit Ataqatigiinnillu neriuutigaarput oqallinneq tunngavilersorluakkanik angusaqarusunnermillu imaqartunik ingerlajumaartoq. Aqqaluaq B. Egede aamma Naaja Nathanielsen oqarput.

- Inuit Ataqatigiinniit aalajangiusimavarput inatsisiliorneq tuaviupiluunnagu ingerlanneqatariaqarmat, inatsisartunilu immikkut ittumik ataatsimiigiaqqusineq aqqutigalugu ingerlanneqassanngimmat. Aatsitassarsiorneq pillugu naalakkersuinikkut suliaqarneq tupaqqalluni akeqqersimaarluniluunniit suliarineqassanngilaq, tassami innuttaasunut pingaaruteqarpallaaqaaq. Ingerlaavartumilli pitsanngorsaataasinnaasut eqqartortuarumaarpavut, eqqartuinerillu pitsannguutissanik kinguneqassagaangata tamakku ilannguttarumaarpavut. Ullormiit ullormut tupaqqalluni aalajangiipallanniarnerit ingerlatissanngilavut. Inuit Ataqatigiit siunnersuutissanik tigussaasunik piffisami qaninnermi saqqummiussissapput, inuiaqatigiillu oqalliseqataanissaat naalakkersuinikkullu suliaqartut isummersoqatiginissaat qilanaaraarput.