Sanaartortoqarli

Qaasuitsup Kommuniani borgmesteri Jess Svane, naalakkersuisut siulittaasuannut Kuupik Kleistimut immikkut allagaqaasiorluni saafiginnissuteqarpoq tikkuartorlugu Nuup avataani sanaartornerup allartittariaqarnerata pisariaqassusia.

- Allagaqaat paatsuugassaanngitsumik oqaasertaqarpoq, sanaartorneq Nuup avataani aallartittariaqalertoq, Jess Svane, nassuiaassivoq. Allagaqaat tamakkiisoq imaattoq saqqummiupparput:

Inissiat 24-t neriorsuutigineqarsimagaluartut suliarineqanngillat
Ukioq kingulleq inissiat 24-it Ilulissani suliarineqarnissaat aalajangerneqarpoq, marts 2011-mi Ineqarnermut, Attaveqarnermut Angallannermullu Naalakkersuisup neriorsuutigimmagu siorna 2011-mi aasartinnagu inissiat suliarineqassasut.

Sisimiuni suliariumannittussarsiuussisimaneq Qaasuitsup Kommunianut tutsinneqarpoq
Inissianik Sisimiuni suliariumannittussarsiuussisimanerup akisuallaarineqarluni kinguartinneqaqattaarnera toqqammavingalugu Qaasuitsup Kommuniani sanaartornerup unitseqqanera pissusissamisoorsorinanngilaq.
Saaffiginnissutit oqaloqatigiittarnerillu arlallit ingerlareeraluartut, suli sooq Nuup avataani sanaartornissap ajornartinneqarnera akissutissarsiffigineqanngilaq.

20-20-60 Nuup avataani unitsinneqarsimapput

Naliginnaasumik inissialiornermi imaluunnit illuliornermi ukiormanna Namminersorlutik Oqartussat sanaartornissamut aningaasatigut periarfissarititaat ulluinnarni taaneqartartut 20-20-60 aamma Nuup avataani unitsinneqarsimapput.

Inissialiornissamut aningaasaliissutit piumaneqarput

Namminersorlutik Oqartussat inissialiornissamut aningaasaliissutaat kommunemut tunniunneqarnissaat Borgmester Jess Svanep saaffiginnissutimini piumasaraa. Sanaartornerup aallartinnissaa tassuunakkut kommunemi pilersaarutit toqqammavingalugit pilertornerussammat, sanaartornerlu oqinnerusumik aamma ingerlasinnaammata.

Kommunemi pilersaarutit soqutigineqanngittut

Qaasuitsup Kommuniani Namminersorlutik Oqartussani allaffeqarfiit suleqatingalugit assingiinngittutigut suliassat piviusunngortinneqarnissaannut suleqatingiittarsimavugut, kisianni paasiuminaatsittarsimavarput kommunemi pilersaarutigut soqutingineqannginneri tamannalu akuersaarneqarsinnaanngilaq.

Naalakkersuisut neriorsuilussinnarnerat ukunani suliani sumik toqqammaveqarnersoq paaserusunneqarluni iliuuseqartoqartariaqalernera pissutsinut akueriuminaatsunut allagaqaammi oqariartuutigineqarportaaq, Jess Svane allappoq.