ADHD-ertut ikiorserneqarnissaat ujartorpaa
Inuit Ataqatigiinnit Olga P. Berthelsenip paaserusuppaa ADHD-rtut sullinneqarnerat inuiaqatigiinnut qanoq aningaasartuutaatiginersoq
- Nunatsinni meeqqat, inuusuttuaqqat inuusuttullu ADHD-mik Autismemillu nappaateqartut, sullinneqarnermikkut ataavartumik aaqqissuussamillu sullinneqarsinnaanissaat anguniarlugu pilersaarummik pilersitsisoqassagaluarpat, tamanna inuiaqatigiinnut qanoq aningaasartuu-taassava?
Taama naalakkersuisunut paragrag 37'ikkut apeqquteqarpoq Inatsisartunut ilaasortaq Olga P. Berthelsen, Inuit Ataqatigiit.
Apeqqutini tunngavilersorlugu:
- Meeqqat ADHD-mik Autismemillu nappaatillit Nunatsinni amerliartorput. Nappaatit taakkua pineqartut, angajoqqaanut, ilaqutaasunut, ilinniartitsisunut, inuiaqatigiinnullumi annertuumik unammilligassatsinnik pilersitsipput artukkiisareerlutillu.
- Nunatsinni sumiiffinni amerlasoorpassuarni, immaqalumi sumiiffinni tamani, ADHD-mik nappaatilimmik/-nik peqartugut qularivallaanngilara. Nunatsinni sumiiffinni aalajangersimasuni inissisimalluni, sumiiffiup periarfissiissutaat tunngavigalugit ilaqutariinnut ataasiakkaanut sullissinerit assigiinngitsuusinnaanerat ernumassutigineqarsinnaavoq. Tamatuma kingunerisinnaavaa meeqqat sullinneqanngitsoornermik kingorna siunissami inuiaqatigiinni inooqataalersinnaanissaasa innarlerneqarnerat, Olga P. Berthelsen oqarpoq.