Nakorsaaneq eqqissisaavoq
Ulluni qaangiuttuni ASR'inik siffiaasalersinnikut pillugit oqallittoqarnera pissutigalugu Peqqinnisaqarfik eqqissisaavoq. Peqinnissaqarfimmi saviminernik siffiaasaliisoqarneq ajorpoq
Tusagassiivitsigut ulluni kingullerni siffiaasat ASR'it eqqartorneqarput, siffiaasat taakku saviminermiksanaajupput.
Ilisimatusartut ukiut kingulliit tallimat qulillu akornanni misissuinerminni saviminernik siffiaasalersittut akornanni ulorianaatilinnik kingunerluuteqartoqarnera maanna paasinarsisippaat.
Taama namminersorlutik oqartussanit nalunaartoqarpoq.
Siffiaasanik saviminiusunik siffiaasalersissimasinnaanerminnik ernummateqartunit nunatsinni peqqinnissaqarfik saaffigineqartalerpoq.
Nunatsinni peqqinnissaqarfik saviminernik sanaanik siffiaasaliisanngimmat ernumassutissaqaranilu misissortinnissamik pisariaqartitsisoqanngilaq.
- Nunani allani nammineq sillimasiinikkut pilatsissimasut akissuteqarfigisinnaanngilagut, nakorsaanerilli saarnit naggussallu nappaataannik immikkut ilisimasallit naapertorlugit siffissamikkut suliaritissimasuni qinnguartarlugit assilisat arlaannaalluunniit saviminermik siffiaasaqanngilaq, nakorsat qullersaat Carsten Thordal oqarpoq.
- Taamaammat namminneq akilikkaminnik suliaritissimasut akornanni saviminermik siffiaasaqartoqarsinnaavoq. Taamaammallu nunatta avataani nammineq sillimmasiinikkut akilikkamik suliaritissimasut pilatsiffimminnut sillimmasiisarfimmulluunniit saaffiginneqqullugit siunnersorpagut, Carsten Thordal naggasiivoq.