Qaanaaq nasamik akilerlugu "pisiaraa"
Politikenip nunat tamalaat silassaannik allattuiffiat nutarterneqarmat atuartartut arlallit qisuariaatigaat - Qaanaaq ilanngunneqaqqippoq
Ilutsit nutaat isumassarsiallu nutaat pitsaajuaannartanngillat.
Tamanna Politikenip paasivaa issanngorpoq aviisimi silassamik ilimasaarummi Qaanaaq peeraluarmassuk.
Taamaattumik aviisip quppernerata kingullersaanni oqaluttualiannguaq allanneqartoq, Sermitsiaq.AG'p soorunami tamakkerlugu ilanngukkusuppaa:
"Atuartartut eqeersimaartut ilaata maluginiarsimavaa Politikenimi nunat tamalaat silamik ilimasaarutaat nutarsarneqarsimasoq."
Illoqarfiit allassimasuutigissallugit ajunngilluinnartut ilaat aaqqissuisumit peerneqarsimapput, takorloorsinnaasimanngilaami tamakku inuit ilaannut qanoq pingaaruteqartigisimanersut. Kukkuppulli. Illoqarfiit ilaat peerneqaraluartoq uterteqqinneqartoq tassaavoq Kalaallit Nunaata kitaata avannaaniittoq Qaanaaq (aamma Thuletut ilisimaneqartoq)
Illoqarfiup taassuma peerneqarnera aviisimik pisartagallit ilaasa Inge Heindl Thomsenip, Kirke Hyllingemeersup akuerisinnaasimanngilaa.
Sapaatit akunneri pingasut matuma siorna Politikenimut allappoq, ullut tamaasa Nunarsuarmi silassaq misissugarisallugit Qaanaallu silaa paasiniartuartarlugu, ukiorparpassuarnilu taamaaliortarsimalluni. Sooq? Aap, allappoq: "Kiannerpaarpaat Qaanaap nillerneranit nalimmassarneqartaarput."
Taava e-mail'imi allakkamini tassanngaannaq Politiken nasatsamik nuersaakkusulerpaa Qaanaap silassaa uterteqqinneqarsinnaappat. "Sila nuannerunnaarpoq Qaanaaq ilanngimmat". Aviisimik atuartartut naammagittaalliutaat taamaattoq aviisini sulisunit tusaanngitsoorneqarsinnaanngilaq. Ilami ilusilersuinermik pisortap Søren Nyelandip Kirke Hyllingimi atuartartumut akissuteqarpoq, neriorsuutigalugu Qaanaaq nuiseqqinneqassasoq. Natsamilli nuersaanneqarnissani naaggaarpaa tunngavilersorlugu "ukioq mannna Danmarkimi sila pitsaalluni nerumimmat."
Taamaattoq Inge Heindl Thomsen unitsinneqarsinnaanngilaq. Qaanaap silassaa aviisimi ilanngunneqaqqittoq takugamiuk nuannaajallangaarami allaqqippoq, nasaq nutaaq nuersarlugu aallartippara. Nasarlu nutaaq aaqqissuisoqarfimmut annguppoq - piffissaq eqqoqqissaarlugu maannakkummi Danmarkimi Qaanaamisulli qiianartigilermat.