Millionerpassuarnik eqquisumik tusatsiakkat
Nettimi oqallisaavoq kalaaleq Knud Møller amerikarmiut lotto-anni 2 millioner dollarinik eqquisimasoq
Amerikarmiut dollarii 2 millionit qallunaat aningaasanngorlugu 11,375 millioner koruunit missaanniipput.
Amerikarmiut lotto-anni 57-inik ukiulik Knud Møller, nunatsinneersoq, 2011-mi oktobarip 25-ianni taamatut amerlatigisunik eqquisimavoq.
Tamanna internettimi oqallisaavoq. Tusatsiagaq Sermitsiaq.AG-p uppernarsartissinnaasimanngisaa eqqortuunersoq eqqunngitsuunersorluunniit.
Netti malillugu Knud Møller pingasunik qitornaqarpoq, Nuummi najugaqarluni Namminersorlutillu Oqartussani oqalutsitut sulilluni.
Tusatsiakkat malilugit taassuma meeqqat atugarisaat pitsanngorsarniarlugit 10.000 dollarinik tunissuteqarniarpoq, aammalu aningaasat atorniarpai qitornami ilinniagaqarnissaannut Nuummilu illumut ileqqaarnissaminut.
57-inik ukiulik Knud Møller Nuummeersoq nalunngiliuk? Imaluunniit tusatsiakkat ilumoornersut ilumuunnginnersulluunniit uppernarsarsinnaaviuk? Taava uunga mail-erit suulut@sermitsiaq.ag