Kalaallit filmiliaat soqutigineqaqaat
Nordatlantens Bryggenimi ussassaarutigineqarput "Ullut kalaallit filmiliaannik filmertitsiviit"
"Ullut kalaallit filmiliaannik filmertitsiviit" Nordatlantens Bryggenimi februaarip 16-ianniit 23-at ilanngullugu ingerlanneqartussat suli aallartinngitsulluunniit soqutigineqarnerat annertuvoq.
Taama Martin Hilker, Nordatlantens Bryggenimi ussassaarinermik paasisitsiniaanermillu pisortaasoq oqarpoq.
Sapaatip akunnerata siulianili - ullut filmertitsivissat sap. ak. pingasunik sioqqullugit - filmilianut "Inuk" aamma "Qaqqat Alanngui" billitsit tamarmik tunineqareerput, maannalu kulturikkup illup filmit takuteqqinneqarnisaat aaqqissuuppaat.
Kalaallit filmiliaat nutaanerit takutinnerisa saniatigut filmitoqqat marluk takutinneqassapput, tassaasut tyskit filmiliaat ”S.O.S. Isbjerg” aamma Hollywood-filmi ”Eskimo”, tamarmik 1933-meersut.
- Taakkua saniatigut isiginnaariat takusinnaavaat Martin Mörcks aamma Mikisoq H. Lyngep oqaluttualiorpalaartumik filmiliaat "Nordafar", taanna siorna ukiakkut Katuami takutinneqartoq, Martin Hilker oqaluttuarpoq.
Nordatlantens Brygge 2006-imi ullut filmertitsiviit Kalaallit Nunaanneersunik, Savalimmiuneersunik aamma Islandimeersunik filmertitsillutik aaqqissuuttarpaat. Tamatumuuna filmit Kalaallit Nunaanneersuinnaat takutinneqassapput isiginnaarusuttullu imaaginnavipput.
Ullut filmertitsiviit pillugu uani annermik paasisaqarsinnaavutit bryggen.dk.