Illuatungeriinneq ingerlaqqittoq

Palle Christiansen aamma Sivso Dorph imminnut appisaluttaarnerat suli ingerlavoq.

Ilinniaritaanermut Ilisimatusarnermut aamma nunat avannarliit suleqatigiinnerannut naalakkersuisoq Palle Christiansen naapertorlugu, Kalaallit Nunaanni ilinniartitsisut piffissamik suliffigisamik 28 procentiat ilinniartitsinivimmut meeqqanillu toqqaannartumik atassuteqarnermut atortarpaat, Danmarkimi kisitsit 40 procentiusoq.

Taamaattumik kisitsit qaffatsinniarlugu suliniuteqalersaarpoq, ilinniartitsisut atuartunik toqqaannartumik atassuteqalersitsisussamik. Tamanna meeqqat atuarfiannit qimatsisut angusaasa qaffasissusissaannik qulakkeerinninnerussaaq.

Ajornartorsiulli uaniippoq Palle Christiansenip ilisimasani kukkusunik tunngaveqarluni pigimmagit. Taama Nunatsinni ilinniartitsisut kattuffiata siulittaasua Sivso Dorph qanittumi oqarpoq.

Palle Christiansen akissuteqaqqippoq:

- Tusagassiuutini atuarneqarsinnaavoq IMAK-ip siulittaasuata meeqqat atuarfianni ilinniartitsisut piffissaq suliffiat pillugu kisitsisinik ukaapaatitsiniarneraraanga, piaraalungalu kisitsisit appasinaarnerarlugit, allaallu kisitsisit kukkusut ilinniartitsisut ajortisarniarlugit atorikka oqaatigalugu.

- Ilumuunngivippoq. Ilinniartitsisut agguaqatigiissillugu piffissaq suliffiat pillugu kisitsit saqqummiussara ”Kalaallit Nunaanni Meeqqat Atuarfiat 2010/2011” atuaraanni uppernarsineqarsinnaavoq, Palle Christiansen oqarpoq.

Naatsorsoruminarsinnaavoq
- Ilumoornerarluarsinnaavara piffissap suliffiup meeqqat peqatigalugit atorneqartup naatsorsornissaa ajornakusoorsinnaasoq, ilinniartitsisumiillu ilinniartitsisumut aamma atuarfimmiit atuarfimmut nikerarsinnaammat. Aammattaaq nunat assigiinngitsut imminnut sanilliunnissaat ajornakusoortorujussuuvoq. Taamaammat assersuutigalugu Danmarkimut assersuulluta piffissaq nukiillu annertuut atortariaqanngilagut, tassanimi pissutsit atuarfiit angissusaannut timelærerinillu atuinermut naleqqiullugit allarujussuupput, Palle Christiansen oqarpoq.

- Taama oqarnerma politikkikkut oqariartuut nikisinngilaa, tassalu Naalakkersuisuniit, ilinniarsimassutsip qaffannissaa anguniarlugu suliniutit arlaqartut ilaattut, kissaatigingatsigu meeqqat atuarfianni meerartatta annertunerusumik pitsaanerusumillu atuartinneqarnissaat. Taamaammat piffissaq ilinniartitsinermut atorneqartoq Ilinniartitaanermut Ilisimatusarnermullu Naalakkersuisoqarfiup naatsorsueriaasia atorlugu imaluunniit IMAK-ip naatsorsueriaasia atorlugu naatsorsorneqarpat, tamatigut kisitsisit appasippallaarput.

Tusagassiiviit aqqutigalugit isumaqatigiinniarnerunngilaq

- Tusagassiuutitigut isumaqatigiinniarnissaq siunertarinngilara, kisianni isumaqatigiissuteqarniartoqarpat isumaqatigiissuteqarniartoqanngippalluunniit Ilinniartitaanermut Ilisimatusarnermullu naalakkersuisutut innuttaasut Naalakkersuisut ilinniartitaanikkut anguniagaannik oqaluttuukkumavakka.

- Isumaqatigiinniarnerit isumaqatigiinniartarnermik immikkoortortaqarfitsinnit ernumananngitsumik isumagineqarumaartut qularinngilara, Palle Christiansen nassuiaavoq.

- Kisitseriaaseq sorleq inuit ataasiakkaat upperiumassaneraat uanga akuleruffigiumanngilara, kisianni siusinnerusukkut uagut naatsorsueriaaserput tamanut saqqummiunnikuuarput.