Angut Kleist Danmarkimi soqutigaat

Angut Kleist, Nanortalik, aningaaserivimmi kontoata kukkunikkut 1,3 million koruuninik ikisiffigineqartoq Danmarkimi aamma tusaamavaat

Angut Kleist pillugu eqqartuussineq danskit tusagassiiviisa aamma sammivaat. Leiff Josefsen

Højesteretip Angut Kleist, Nanortalik pillugu eqqartuussineq saqqummiinera tusagassiivinnit arlalinnit malinnaavigineqarpoq.

Angummik kukkunikkut aningaaserivimmi kontoanut 1,3 million koruunit ikisoqarnerata kingorna - inuttaata tyskit eqquiniaasitsisarfianni eqqorsimasorisaanik – aningaasanik atuisimaneranik oqaluttuaq. Angut Kleist sulisut toortaanerlunnerannit pisoorsuanngoraluarpoq. BBR’ip aningaasarpassuit aningaaserivimmi kontoanut ikivaat, aningaaseriviullu kingusinnerusukkut aningaasat ikineqartut Angut Kleistimit pigineqarnerarmagit Angut Kleist piisaartuatsianngorpoq.

Kalaallit Nunaanni tusagassiorfiit aamma Ritzau malinnaapput. P3 nutaarsiassiinerani ulloq naallugu Angummik oqaluttuaq ingerlanneqarpoq, Jyllands-Posten aamma Politikenip nittartakkaminni aamma eqqartorlugu.

Angut Kleistimut eqqartuussut tamakkiisoq sapaatip akunnerani AG’mi saqqummersumi atuarneqarsinnaavoq ”- Ajortuliorsorinngikkaluarpunga”.

Højesteretip Nunatta eqqartuussiviata eqqartuussutaa atuuttussanngortippaa. Isumaqarpoq Angut Kleist nal. ak. 100 inuiaqatigiinni kiffartuussissasoq, imigassamik atornerluinerminik katsorsarneqassasoq aamma tarnikkut katsorsarneqassasoq. Tamakkua saniatigut aningaasat 421.500 kr.-it, Angut Kleistip atugai, ikinngutiminut, ilaquttaminut pissaaleqisunullu arsaarinnissutigineqarput.

Illit qanoq isumaqarpit, Højesteret Angut Kleistimut ingasappallaamik eqqartuussiva? Illit isinnik isigalugu eqqartuussineq naapertuilluarpa?

Powered by Labrador CMS