- Meerartagut peqqissuupput

Sulilu peqqinnerulissallutik, taamaammat “Meeqqat atuartut peqqissusaat pillugu nalunaarusiaq” nutaaq tikilluaqqunarpoq. Nalunaarusiami innuttaasut peqqissuunissaat pillugu suliniummi Inuuneritta-mi meeqqat atuarfianni atuartut peqqissusaannut tunngatillugu anguniakkat sumut killinnerat ersersinneqarpoq, tamannalu ilisimatuut inuiaqatigiillu suleqatigiilluarnermikkut angusaqarluarsinnaanerannut assersuutisaalluarpoq, peqqissutsimut naalakkersuisoq Agathe Fontain, tusagassiivinnut oqarpoq.

Atuarfiit tamarmik 5. klassimiit 10. klassimut atuartuutillit misissuinermi peqataanissamut neqeroorfigineqarput. Peqataasut katillutik 2182-iupput, imaluunniit atuartut 40 %-ii.

Innuttaasut peqqissuunissaannik suliniummi Inuunerittami peqqissuseq inuunerlu naleqarluartoq imminnut ataqatigiilluinnarput. Meeqqat inuusuttullu naleqarluartumik ineriartorfiusumillu inuuneqarnissaannik anguniagaqarneq ajunngitsumik ingerlavoq. Misissuinermi paasisat naapertorlugit 2010-mi meeqqat peqqissut meeqqallu inuunermik naleqarluarneranik naliliisut 2006-imi misissuinermut sanilliullugu amerleriarput.

Aamma allatigut, ilaatigut nerisarisartakkat pitsanngoriaateqarnerannik, misissuineq takussutissiivoq. Meeqqat ullut tamakkiallugit mamakujuttutortartut ikileriarsimapput, meeq­qallu ullut tamaasa naatitartortartut amerleriarsimallutik. Taama nerisaqarneq nappaatinut pitsaaliuutaammat angusaq nuannaarutissaavoq.

Kigutigissuunissamut tunngatillugu meeqqat ullormut marloriarlutik kigutiminnik saliisartut 2006-imut sanilliullugit 2010-mi amerleriangaatsiarsimapput.

- Meeqqat inuusuttullu ileqquinik allannguisinnaasimanerput qujanaqaaq, sulili anguniagassaqarpoq. Allannguiniarnitsinni angusimanngisagut angajoqqaat, atuarfiit meeq­qanillu sullissiviit peqatigalugit suliniuteqarfigissavagut. Taakku innuttaasut peqqissuunissaannik suliniutip Inuunerittap nutarterneqarnerani ilanngutissavagut. Imigassaq Ikiaroornartorlu pillugit Siunnersuisoqatigiinnik suleqateqarninni taakku aamma ilanngunniarpakka” Agathe Fontain oqarpoq.

- Meeqqat namminneq peqqinnartumik inuuneqarnissaminnut akisussaaffeqannginnerat erseqqissaatigissallugu pingaaruteqartoq isumaqarpunga. Peqqinnartumik inuuneqarnissaq ilinniagassaavoq. Meeqqat tupamik imigassamillu atuinerisa allannguuteqannginnerat uagut nammineq pisuussutigaarput. Namminnermi tupasisinnaanatillu imigassarsisinnaanatik tamakku suminngaanniit pissarsiarisarpaat?

- Meeqqat peqqinnartumik inuuneqarnissaannik takutitsinissaq peqqinnartumillu inooriaaseqarnikkut naleqartitamik inuuneqarnissaannut kaammattuinissaq uagut inersimasutut pisussaaffigaagut, Agathe Fontain oqarpoq.