DTU ilinniartunik ilassinnilluarput
DTU, Danmark Tekniske Universitet, sapaatip akunnerani qaangiuttumi inginiørinngornianik nunatsinneersunik tikeraarteqarput. Ilinniartut Lyngbymut ingerlaqqissaapput
Diplominginiørinngorlutik Arktisk Teknologimi ukiut sisamassaannik ilinniartut januaarip 24'anni DTU'mi ilinniartut isumaginnittaannit Niels Hoedeman aamma dekanimit Martin Vigildimit ilinniartitsisunillu arlalinnit tikilluaqquneqarmata arlalinnik akimmisaarutitaqarnera malugineqarsinnaavoq. Ilinniarnerup immikkoortortaa siulleq Sisimiuni sanaartornermik ilinniarfimmi ingerlanneqartarpoq. Ilinniarnerup immikkoortuini marlunni tulliuttuni atuarneq DTU'mi Lyngbymi ingerlanneqassaaq ilinniarnerullu immikkoortuata arferngat suliffimmi sungiusarnermik ingerlatsiffiuvoq.
Tikerlaat immikkoortunut pingasunut aggulullutik ilinniartunik siuarsimanerulaanik unammisinneqarput paasiniarlugu kikkut spaghettit aamma skumfiduit atorlugit portunerpaamik napasulianik sanasinnaanersut. Suliap portussusaa aammalu siallersorujussuarmi nuna 10 sekundinik sajutsittuusaarlugu nappaarinnerusinnaasoq unammissutaavoq.
Ajugaasut suliaat nerrivimmit qummut 125 cm'inik portussuseqarpoq patajaalluni nuna aalasoq sialullu akiorsinnaallugit; siallertuusaartitsinermiilli masannartuliortitsinerup pastap napasinnaassusaa innarlerneqarpoq minutsit marlussuit qaangiummata equjartulerami, naallu unammineq aallartimmat portunerugaluaqaluni qumarluni.
- Kalaallit Nunaannik suleqateqarneq DTU'mut isumatoorujussuuvoq, Michael Faber ARTEK'imut pisortaasoq aamma Sanaartornermik ilinniarfimmi immikkoortortamut pisortaq oqarpoq.
- Ilinniartut immikkut illuinnartumut piginnaanngorsarlutik ilinniarnerannut periarfissaq pitsaasuuvoq ilinniartummi naammassigunik immikkorluinnaq pissusilimmi nunami sulinissaannut piukkunnarsarfiummat nalissaqanngitsoq, DTU tusagassiivinnut allappoq.