Meeqqat tupatuumasut tuppatigaat

- Annilaammisaarnarpoq ernumanarlunilu meeqqat inuusuttullu 11-niik 16-nut ukiullit 2010-mi pujortarnerusimasut 2006-mut naleqqiullugu.

- Ineriartorneq killormut ingerlavoq pisariaqarporlu politikkikkut sukkanerpaamik iliuuseqartoqarnissaa. Demokraatini pineqartoq pillugu nuna tamakkerlugu iliuusissanut pilersaarusiornissaq piumasaraarput.

Taama nipeqarpoq Astrid Fleischer Rex, Demokraatit Inatsisartuni peqqinnissaq pillugu oqaaseqartartuata piumasaqaataa taama nipeqarpoq.

Fleischer Rexip qisuariaatigaa ”HBSC Greenland-undersøgelsen 2010”, misissuinerummi takutippaa Kalaallit Nunaanni meeqqat atuartut akornanni pujortarpallaartoqartoq.

Naatsumik oqaatigalugu meeqqat 11-niik 16-nut ukiullit pujortartartut amerlisimapput meeqqallu angajulliit affaat aamma suli ullut tamaasa pujortartarput. Assersuutigal www.liv.dk naapertorlugu danskit 9. klassiini atuartut quliungaangata ataaseq ullut tamaasa pujortartarpoq. Ilaannikkut pujortartartut tamaasa katikkaanni, inuit sisamaangaangata ataaseq pujortartarput – maani pujortartartunut naleqqiullugu ikinneerarsuit.

Tuluit Nunanani Cancer Research naapertorlugu 15-nik ukiullit akornanni 12 procentiinnaat pujortartarput – maani pujortartartunut naleqqiullugu aamma ikinneerarsuit.

- Tamanna tunngavigalugu qularutigineqassanngilaq, maani nunatsini allanut assersuutigerusuttakkatsinnut naleqqiulluta assut kinguarsimagatta. Tamanna sussaanngilaq taamaattumik Demokraatini isumaqarpugut, suut tamaasa atorlugit meerartagut inuusuttagullu pujortarnaveersaartittariaqalerigut, oqarpoq Astrid Fleischer Rex.

- Aallaqqaasiutigalugu nassuerutigisariaqarparput, 2006-mili suliniutit naammassimanngimmata, suliassarlu siulleq tassaasariaqarpoq paasiniassallugu suna iluatsissimannginnersoq sutigullu allatut iliortariaqarnersugut.

Piffissaq atortariaqarpoq
- Demokraatini kaammattuutigissavarput pujortartarnerup ulorianassussaa qaammarsaatigisalissagipput meeqqat mikisunnguuneranniik. Pingaaruteqarpoq angajoqqaat meeqqatik pujortartarneq pillugu oqaloqatigisassammatigit oqaluttuaralugu pujortarneq inerteqqutaasoq kukkunerusorlu pujortartalertarneq. Tamakku pillugit oqaloqatigiinnerit angerlarsimaffimmi perorsaanerup naliginnaasup ilagisariaqarpaa – soorlu nerisanut qujasarnissap perorsaatigisarneratut.

- Tamatuma tulliatut aamma pingaaruteqarpoq, qaammarsaallaqqinnerulernissarput, sapaatip akunnerani aalajangersimasumik qulequtaqarluta eqqartuillaqqissinerunissarput il.il. meeqqat atuarfiini klassini minnerni meeqqat pujortartarnerat pillugu. Tamanna peqataasinnaavoq meeqqat cigarittimik siullermik kukutsinnginnissaannut, Astrid Fleischer Rex naliliivoq.

Demokraatini qulaani taariikkagut tunngavigalugit Peqqinnissamut Naalakkersuisoq Agathe Fontain siuttooqquarput meeqqat inuusuttullu pujortartalinnginnissaat pillugu nuna tamakkerlugu iliuusissamik pilersaarusiornermi.

- Eqqarsaatigineqarsinnaavoq Neriuffiup peqataatinnissaa aallaqqaataaniit. Pingaarnerpaavorli piaarnerpaamik aallartinnissaq. Piffissaqanngilagut utaqqissalluta Astrid Fleischer Rex, oqarpoq.