Erfalasorput illersorneqarpoq
Kuupik Kleistip Aleqa Hammond erseqqissaaffigaa erfalasutta maannamut siunissamilu illersugaanera pillugu
Siumup siulittaasua Aleqa Hammond, ungasinngitsumi paragraf 37 aqqutigalugu naalakkersuisunut apeqquteqaateqarpoq, Naalakkersuisut sulissutigilersaarneraat Erfalasutta pisortatigoortumik illersorneqarnissaa.
Naalakkersuisut siulittaasuat Kuupik Kleist, Aleqa Hammondimut erseqqissaatigaa ernummatissaqanngitsoq: Erfalasorput pillugu erseqqissunik malittarisassiortoqareermat.
- Kalaallit Nunaata erfalasua pillugu Inatsisartut inatsisaat nr. 6 11 juni. 1985-imeersoq tunngavigalugu immikkut ittumik kalaallit erfalasoqarnerat akuerisaavoq. Nalunaarummit 24. juni 1985-imeersoq tunngavigalugu erfalasutta ilusilersorneqarnera aalajangersarneqarsimavoq aammalu naalunaarut nr. 26 11. november 2008-meersoq naapertorlugu ullut erfalasulisaarfissat allassimasuutaapput. Taanna tunngavigalugu ullut sorliit pisortatigoortumik pisortat suliffeqarfiutaanni erfalasulisaarfissaanersut aalajangersarneqarsimapput, Kuupik Kleist nassuiaavoq.
- Qulaani taaneqartut tunngavigalugit isumaqarpunga erlasorput pillugu suliassaqarfimmi tassani inatsisiliortoqareersimanera erfalasuttalu atorneqarsnissaani aalajangersaasoqareersimanera pissutigalugit pisortatigoortumik illersugaasoq pisortanillu oqartussaaffigineqartoq, naalakkersuisut siulittaasuat allappoq.