Ilinniartitaaneq nunatsinnit suliniutigineqarpoq

Grønlandshavnimi sutortarfimmi sap. ak. pingajuanni Kuupik Kleist, Royal Arctic Logistic’ip initaavani takornariartinneqareernermi kingorna oqarpoq, soorunami siunissami pisussat eqqoriarsinnaanagit taamaattoq naalakkersuisut ukiunut aggersunut pilersaarutaannik saqqummiussisinnaalluni.

Kuupik Kleistip sassannginnerani Aalborgip borgmesteria Henning G. Jensen, tikilluaqqusivioq. Tusarnaariat assigiinngitsunit akulerisitaartut ilaat kalaallit, nunatsinnit ilinniartut, inuussutissarsiortut universititineersut ilaat taassagaanni.

Henning G. Jensen aallarniilluni erseqqissaavoq kalaallit jyllandimip avannaani najugallillu eqqarsartaatsimikkut ataatsimoorussaqartut, sassartaarniannginnertik oqaaserpassuarnillu atuisuunngillat ingasattajaarnianngitsuunerisalu inunnut Kalaallit Nunaanneersunut qanillinissaq sukkatisartarpaa.

Kuupik Kleistip aallaqqaasiullugu naalakkersuisut pilersaarutaat saqqummiuppai, ilinniarnerup pingaartittuarnissaa, Kalaallit Nunaata ukiuni qulini qaangiuttuni ilinniagaqarnermut aningaalisutaasa marloriaatinngorsimanerat attatiinnarneqassasoq, maannamut ilinniakkamik naammassinnittartut ikippallaarnerat mumisinneqartariaqartoq siunissami inuussutissarsiornermik ingerlatsineq assigiinngisitaartup pilersinnissaa qulakkeerniarlugu, tamassumalu piumasaqaatitarigaa assigiinngitsunik ilinniagaqarsimaneq. Kalaallit Nunaata aningaasarsiornermini inuussutissarsiutit maannamit assigiinngisitaarnerusut misilittaaffigisariaqarpai, takornariartitsinermik aatsitassarsiornermilu suliassaqarfiit Nunatta aningaasaqarneranut tapitartuutaasunngorlugit.

Kuupik Kleist aamma oqaluttuaraa, Kalaallit Nunaata aningaasaqarnera nunarsuarmi aningaasameernermit eqqugaasimanngitsoq:

- Missingersuutitsinni inerniviusoq nul’iuvoq. Nunat ilaasa usoritsassutigisagaannik, soorlu danskit nalagaaffiata, Kuupik Kleist oqarpoq.

Qanga sanaartukkanik akisussaasunngornermi illuutigilikkat oqummik eqqugaasut amerlassusaat nunap aningaasaqarneranut ima sunniuteqartigaaq, oquiaanermi aningaasartuutit, ilinniartut pisariaqartinneqaqisut kollegiassaannit pilersaarutaareersunit illunik iluarsartuussinermut atugassatut nuunneqartariaqarlutik.

Aalisakkat nunanut allanut tunisassiarineqartartut siornatigutut amerlatigaat, taamaattoq tunisinermi nali soorlu raajanik qaleralinnillu tunisinermi nali 25 procentimik qaffariarsimavoq, aalisartutnit siornatigornit ikinnerusunit. Kisianni kalaallit aalisartut aamma piniartut ukiumut agguaqatigiissillugu taamaallaat 50.000 kr.-inik isertitaqartartut naalakkersuisunit qanoq iliuuseqarfigineqassasoq, isertitaasa qaffanneqarnissaat aammalu Kalaallit Nunaanni aningaasarsiat assigiinnginnerujussuat millisarneqartariaqartoq. Aalisakkat pisarineqartartut amerlisinnaanngillat imminut napatissinnaanermut akornutaassammat.

Kalaallit Nunaata nunanit tamalaanit isiginiarneqarnerulerpoq, aatsitassarsiornissamut 100-nik aamma uuliasiorsinnaanermut akuersissutinik tunniussisoqarpoq. Nunatta aningaasaliiffigissallugu soqutiginaateqarnera ussassaarutigineqartoq ilungersorluni suliarineqartoq.

Immitsinnut piumasaqarfigeqaagut aamma suliffeqarfinnut soqutiginnittunut sillimanissaq eqqarsaatigalugu piumasaqaatigut sakkortupput, soorlu aatsitassarsiussagaluarunik qimatsinissami iluarsaassinissamut aningaasaliissutissat ilaapput. Norgemit Canadamillu periutsigut soqutigalugit paasissarsiorfigiartorluta orninneqartarpugut. Issittumi uuliasiornermik ingerlatsinermi upalungaarsimanissaq pillugu ileqqoreqqusaliat misissorumasarpaat, Kuupik Kleist tanngassimaarluni oqaluttuarpoq.

Alcoap aluminiumik suliniutaa annertooq, pilersinneqassappat aatsitsivinnit annersaalersussaq pillugu Kuupik Kleist oqarpoq, nammineq inuttut qularalugu Namminersornerullutik Oqartussat aningaasaleeqqataaffigisassatut soqutigissagaa, pilersinneqassappat.

Naggataatigut apeqqarissaartoqarpoq ilaatigut timmisartuussineq eqqaaneqarluni. Nuummit Aalborgimut toqqaannartumik aqqut oqaasertaliiffigineqarpoq, ilaatigut Aalborgip borgmesteriata Henning G. Jensenip neriorsuilluni, nammineq Aalborimit Nuummut toqqaannartumik timmisartuussinermut siullermut ilaajumaarluni.

FN’imik suleqateqarneq aamma apeqqutigineqarpoq aammalu Kalaallit Nunaat inuuussutissanik nunanit allanit tikisitsiortornerata millisarneqartariaqarnera eqqartorneqarluni.

Kuupik Kleist nalunaaqquttap akunnerata affaani timmisartussaminut ingerlaqqinnginnermini piffissaq atorluarlugu assigiinngitsorpassuarnik tikitaqarpoq.