Pitsaanerit unammineranni Minik 15-eriarluni målertoq
1. divisionimi pitsaanerit pingajuat Odder Håndbold pitsaanerillu sisamaat HC Fyn tallimanngornermi unnukkut Faaborgimi naapipput
Angutit assammik arsaannermi 1. divisionianni pitsaanerpaat pingajui aamma sisamaat, tassaasut Odder Håndbold aamma HC Fyn tallimanngornermi unnukkut unammipput.
Unamminerup annersaani kalaallit assammik arsartartut Aqqaluk Sørensen Odder Håndbold aamma Minik Dahl Høegh Jakob Larsenilu HC Fyn, arsaqaapput.
Unammineq aallartillugu siggartoqartorlu unamminerup pingaaruteqarnera qularutissaanngilaq. Arsaq unammissutaaqaaq saassussisaqattaarnerillu tulleriiaatiinnavipput. Odder Håndbold aallartilluarneruvoq. HC Fyn akiuulluarnermigut 7 - 7-imut anngupput. Unamminerup immikkoortuata siulliup ingerlanerani Odder Håndbold målinik marlunnik pingasunilluunniit siuarsimajuarput. Minik Dahl Høegh målit tulleriiaatiinnarlugit isaatippai, immikkoortoq siullianni qulingiluanik isertitsilluni. Naammanngillalli. Aqqaluk Sørensen taassumalu unammeqatai unamminerup nikinnissaanut qasuersaariartorput målinik pingasunik siuarsimallutik 21 - 18.
HC Fynip nalinginnaasumi illersuisui nukittusaraluartut qaangiinnarneqartarput. Unamminerup immikkoortuata aappaani sungiusaasuuneq Jakob Larsen illersuisut patajaallisarniarlugit unammeqataalerpoq.
Unamminerup immikkoortuata aappaani unammisut tamarmik tulleriiaatiinnarlutik isertitsisarput. HC Fyn akiuulluarnermigut siuarpoq 23 - 22. Piffissap ilaani akiuuttut naligiikkaluaqaat Odder Håndboldili sukaqqikkami unamminermi 36 - 33 ajugaapput.
Unamminerup immikkoortuata aappassaani Minik Dahl Høegh takutitsiniarnini nangeqqippaa arfinilinnik isertitseqqilluni. Unamminermi målit 15-it isertikkamigit angutit 1. divisionianni isaatitsinerpaatut inissisimajuarsinnarpoq.
Aqqaluk Sørensen arsaattarfitoqqaminut unamminermi ataatsimik isertitsisoq.
Sungiusaasuunerup Jakob Larsenip ajorsaqqinnertik uggoreqaa. - Ajornanngippallaamik isertitseriarsinnaalersarput. Unammineq tamaat isigissagaani illersuinerput pitsaavinngilaq målimiittugullu annaanneqarsinnaasunik tigusineq ajorput, ajugaassagaanni tamanna pisariaqarpoq Minik 15-inik isertitsigaluarmat.