Danskit kalaallinik isumaat pigiliutiinnakkat
Arfininngornermi DR'imi P3'imi radiukkut aallakaatitakkut danskit kalaallinik isummersuutaat pigiliutiinnakkat sammineqassapput
Illarnartut, oqaatsitigut paatsooqatigiinnerit, sianiitsoornerit allarpassuillu nunatta kalaallillu pillugit, danskit isummersuutaasa pigiliutiinnakkat aallakaatinneqarnerani eqqartorneqassapput. "Fordomsfrekvensen" isummiutiinnakkat ilumuunngitsut ilumoortullu aallakaatippagit, illarnanngitsoornavianngilaq.
Arfininngornermi nal. 14-imiit 16-imut nalunaaqquttap akunneri marluk atorlugit nunarput kalaallillu sammineqarpata ilaatigut naalakkersuisunut ilaasortaq Palle Christiansen pulaartigineqassaaq, aallakaatitsivimmiissaaq isiginnaartitsisartoq Rebecca Svensson. Angajoriit Nukâka Coster-Waldau aamma Maja Motzfeldt-Haahr aamma pulaartorineqassapput. Taakku isummiussanik nalilersuissapput.
Aallaqqaasiut ima nipeqarpoq:
- Avanersuaq nunarsuup qeqertaasa annersaat ippoq. Imminut akerliugaluaqisumik "Grønlandimik" ateqartoq, nuna qorsuuneragaq sikuinnangajaasoq. Kalaallit Nunaat nunaavoq Danmarkip nalagaaffiata iluani namminersorluni oqartussaasoq, nalagaaffeqatigisarput ukiuni hornorujuni marlussunni.
- Kalaallit Nunaanni inuit 55.000 miss. najugaqarput, Horsensimi innuttaasut amerlaqataat. Kalaallit Folketingimi marlunnik sinniisuutitaqarput, ukiullu 100-t, tassa kinguaariit marlussuit ingerlaneranni nunap atugartuunngorsagaanissaa uagut ulapputigeqaarput. Pitsaanerpaammik ingerlanneqarsimanngilaq.
- Taamaattoq kalaallit taakkuugunarput, danmarkip kujataamiuisa amerlanerpaanik pigiliutiinnakkaminnik isumaqarfigisaat. Ilaat imaattut, kalaallit angerlarsimagaangamik tarrup ataani ulloq naallugu puisip tinguanik nerisartut, Danmarkimiikkaangamik tamatigungajak aalakoortartut - ajornanngippat Christianshavns Torvemut qanittumi.
”Fordsomsfrekvensen” arfininngornerit tamaasa nal. 14-16 aallakaatinneqartarpoq - "isummat pigiliutiinnakkat suulluunniit sammineqarsinnaapput. Illit nammineq periarfissaqarputit isummaq pigiliutiinnagaq pillugu nal. ak. marlunni, nammineq sammisassannik toqqaanissannut. Taava paasisavagut suut eqquunnersut suullu silaqarluanngitsuunersut".