Politikkerit: Kikkunnut tamanut aqqut nutaaq
Kalaallit Nunaata aamma Canadap akornanni aasaanerani timmisartuussisalernissaq kikkut tamat iluaqqutigissavaat, Inatsisartut Nunanut allanut sillimaniarnermullu ataatsimiititaliaa oqarpoq
- Inatsisartut Nunanut allanut sillimaniarnermullu ataatsimiititaliaata nuannaarutigaa Air Greenland aasaanerani Nuup Iqaluillu akornanni toqqaannartumik timmisartuussisalernissamik ammaaniarneq nalunaarutigimmassuk. Ukioq manna juunip 18-ianni aqqut ammarneqassaaq.
Inatsisartut Nunanut allanut sillimaniarnermullu ataatsimiititaliaata siulitaasua Justus Hansen, Demokraatit allappoq.
- Aqqutip nutaap nunatsinnit ammarneqarnerata nassatarisaanik inunnut Canadamiittunut kulturikkut aningaasarsiornikkullu suleqatiginerunissanik nunallu marluk akornanni suleqatigiinnerunissaasa nukittorsarnissaannut iluaqqutaassaaq. Aammali neriuutigineqarpoq nunat naalakkersuinikkut suleqatigiinnerat nukittorsarneqarnissaa. Tamatuma saniatigut timmisartuussisalernerup nassataraa amerikkap nunavittaanut angalanissat periarfissarinnerulernerinik.
Ataatsimiititaliap neriuutigaa Kalaallit Nunaata Canadallu akornanni toqqaannartumik aqquteqalernera aningaasarsiornikkut ineriartorluarfiussasoq Islandimut Danmarkimullu ukioq naallugu toqqaannartumik attaveqarneq assigalugu ineriartortitsisoqaqqullugu.
Air Greenland ilisimatitsereerpoq Nuup aamma Nunavumi Iqaluit ajornanni timmisartuussisarnissani Dash-8 timmisartoq 34-nik ilaasoqarsinnaasoq atorneqassasoq. Nuup Iqaluillu akornanni timmisartorneq nal. ak. ataaseq minutsillu 45 atorlugit ingerlaartoqartassasoq, siumut aqqut 4.300 koruuneqassasoq.
Inatsisartut Nunanut allanut sillimaniarnermullu ataatsimiititaliaa tallimanik ilaasortaqarpoq. Siulittaasup Justus Hansen, Demokratineersup saniatigut ilaasortaapput, siulittaasup tullia Juliane Henningsen, IA, Jane Petersen, IA, Aleqa Hammond, Siumut aamma Knud Kristiansen, Atassut.