Imartarput ilisimaneqanngilaq
Miljøminister Ida Auken naliliivoq Kalaallit Nunaata imartaata 20 procentia nalunaarsorneqarsimasoq – imaatigut sillimaniarnerup pitsaannginneranik naleqarpoq, IA isumaqarpoq
Danskit miljøministeriat Ida Auken taggissivoq, Kalaallit Nunaata eqqaani imartaq 20 procent taamaallaat uuttortarneqarsimasoq.
Avatangiisinut naalakkersuisup Sara Olsvigimut akissuteqaatigaa, tunup sineriaa ataasiakkaaginnarnik nalunaarsugaasoq, Upernaviulli avannaani tamatigut tamaana nalunaarsuisoqarsimasoq.
Sara Olsvig, IA’p folketingimut ilaasortaatitaa, juullip siunitsiaa miljøminister Ida Auken apeqquteqarfigaa, nunatta imartaata sineriaa qanoq annertutigisoq uuttortarneqarsimanersoq. Miljøministerip akissuteqaammi allappoq imartap 2.127.600 kvadratkilometerisut annertussusillip, 20 procentia kisimi nalunaarsugaasoq.
- Qularutissaanngilaq imaatigut angattut ukiuni makkunani amerliartormata. Uagut nammineq kitaani kangianilu uuliasiornermik ingerlatsivugut aamma ukiuni kingullerni takornariartaassuit angallattut malunnaatilimmik amerliartorput. Taamaattumik isumaqarpunga ulapungaarsimanissaq eqqarsaatigalugu, imartanik nalunaarsuinissaq pingaartinneqartariaqartoq, imartat naammanngitsumik paasissutissartallit misissorneqanerisigut, Sara Olsvig oqarpoq.
Imaatigut sillimaniarneq
- Isumaqarpunga tuaviuuttariaqartoq. Kangiata Kitaatalu avannaatalu sineriaani uuttortortarneqarsimanngitsut iluarsisariaqarput, immap assingi ullumi atukkatsinninngaanniit naleqqunnerusut. Aamma misissortariaqarparput nunat issittumiittut allat uuttortaasimanersut, nunatta aningaasarsiornermik killeqarfiata iluani, uuttortaanerniillu paasissutissaatigut ataatsimoortillugit, Issittup imartaata assinga pigilerniarlugu. Imaatigut sillimaniarnermut pingaaruteqarnerpaajuvoq immap assinganik peqarnissaq, Sara Olsvig itisiliivoq.
Kalaallit Nunaata imartaata sineriaata uuttortarneqarnissaanik Danmarkip nalagaaffia akisussaasuuvoq, Miljøministeriap ataani Kort & Matrikelstyrelsimit akisussaaffigineqarpoq. Sara Olsvigimut akissummi Miljøministeri aamma ilisimatitsivoq, imartamik nalunaarsuinermik suliaqalertorniarnermi Namminersorlutik Oqartussat aamma Royal Arctic Line suleqatigineqartut.