Jens B.: Akiligassat imaapput

Kujataani Qorlortorsuarmi erngup nukinganik nukissiorfiliorneq pillugu Energikonsortiet I/S-imut isumaqatigiissitsiniartarfikkoortitsinermi Nukissiorfiit ajorsassappata Kommune Kujalliup naatsorsuinera malillugu tamanna Narsami Qaqortumilu ilaqutariinnut tamanut 100.000 koruuninik akeqassaaq, akiligassaq innuttaasunut ingerlateqqinneqassappat.

Maanna ineqarnermut, attaveqarnermut angallannermullu naalakkersuisup Jens B. Frederiksenip KNR-p "malittarisassat piumasamik paasineqarsinnaanerannik« saqqummiussinera erseqqissaateqarfiginiarpaa.

- Naalakkersuisut imaluunniit Nukissiorfiit aalajanginngilaat Narsap Qaqortullu isumaqatigiissutsiniartarfikkoortitsineq akilissagaat. Nukissap akii qanoq aalajangerneqassanersut aalajangerneqarsimavoq Inatasisartut assigiissumik akeqartitsinerup aaqqissuuteqqinnissaanik aningaasanillu inatsisimmik akuersissuteqarnerisigut. Akit akuersissutiginerisigut naalakkersuisut tamatumani malittarisassat periutsillu malissimavaat.

- Assigiissumik akeqartitsinerup aaqqissuuteqqinneqarneratigut siunertaasimavoq atuisartunut akit illoqarfinni pilersuinermut aningaasartuutinut naapertuutissasut. Pilersuinermik ingerlatsiviit illoqarfinni aningaasartuutaasa ilarparujussui tassaapput innaallagissiorfinnik, erngup nukinganik nukissiorfinnik, innaallagissamik ingerlatitsivinnik il.il. sananermi aningaasartuutit. Taamaattumik aningaasartuutit qaffariaataat, suliniutip sananerata naatsorsuutigisamit akisuneruneranik imaluunniit entreprenørimik aaqqiagiinngissuteqarnermik pissuteqartut, sumiiffinnit ataasiakkaanit akilerneqassapput, Jens B. Frederiksen tikkuaavoq.

"Akiligassarujussuup innuttaasut ulorianartorsiortippai"

Aningaasartuutit agguataarnerat
- Taavalu aningaasartuutit agguataarneqarnerat politikkikkut annertunerusumik annikinnerusumilluunniit isumaqatigiinngissutigisinnaavarput. Aningaasartuutit tamarmik ilaannaalluunniit Narsami Qaqortumilu atuisartunit akilerneqassappat? Ersarippoq akit qaffannerat sakkortuumik eqquisoq.

Jens B. Frederiksen malillugu aamma annertunerusumik annikinnerusumilluunniit isumaqatigiinngissutigineqarsinnaavoq immikkut aningaasartuutit tamakkua nukissamik atuisartut akileraartartulluunniit akilissaneraat.

- Tamanna peqatigalugu uannut pingaaruteqarpoq erseqqissassallugu Narsami Qaqortumilu atuisartut aningaasartuutit tamaasa akilissanngikkaat. Innaallagiaq akisunerpaaffissaqarpoq, atuisartunik akinut qaffasinnerusunut illersuisumik. Akip qaffasinnerpaaffissaa aningaaasalerneqartarpoq atuisartunit allanit agguaasseqqinnikkut, assersuutigalugu Sisimiuni Nuummilu innaallagissamik atuisunit akileraartartunillu, aningaasanut inatsit aqqutigalugu.

- Erseqqissarusuppara innaallagissap akii najugaqarfinni amerlanerpaani ukioq manna januaarip aallaqqaataanit apparmata. Innaallagissap kilowatt-time-mut akisunerpaaffissaa 3,48 koruuniniit 3,33 koruuninut appariarpoq, Jens B Frederiksen oqarpoq.