Issittumi aallartitaqalernera nuannaarutigaa

- Nunanut allanut tunngasunut ministerip suliniutaa ilassilluarparput sutigut tamatigut Issittoq pingaartinneqarmat, Kuupik Kleist oqarpoq

Issittumi aallartitamik toqqaaneq naalakkersuisut siulittaasuata Kuupik Kleistip nuannaarutigaa. Assi: Leiff Josefsen

Ataasinngormat unnukkut nalunaarutigineqarpoq Klavs A. Holm ilaatigut Singaporemi aallartitaasimasoq nunanullu allanut ministereqarfimmi Public Diplomacymi pisortaasimasoq "issittumi aallartitatut" toqqarneqarsimasoq.

Ilaatigut qulakkeersuttaavaa issittoq pillugu periusissat siusunnerusukkut nunanut allanut ministeriusimasumit Lene Espersenimit Konservativineersumit akuerineqarsimasut pappilaannaajunnaarlutik pivusunngortinneqassasut.

Toqqaaneq naalakkersuisut siulittaasuata Kuupik Kleistip nuanneerutigeqaa.

- Nunanut allanut ministerip suliniutaa ilassilluarparpu, sutigut tamatigut issittoq pingaartinneqarmat.

- Uagutsinni aamma naatsorsuutigineqarpoq naalagaaffeqatigiinni issittumi pingaaruteqarluarsimasuni suliniuteqartuarneq nanginneqarmat. Ulut tamaasa suliassaqarfik "Issittoq" annertusiartorpoq, Kuupik Kleist oqarpoq maluginiarlugulu nalinginnaasumi Issittup siunissaa qulakkeerniarlugu nunat tamat akornanni suleqatigiinnissaq piumassuseqarfigineqarnerulersimasoq.

- Maannakkorpiat naalagaaffissuit tamarmik akuupput, pissaanilissuartut taasakkavut. Rusland, Canada, USA aammali Danmark, Island Skandinaviallu sinnerani nunat tamarmik arlaatigut issittumi pingaarutilimmik inissinniarput. Siorna periusissavut ataatsimoortut saqqummiuppavut, taassumalu kinguneraa issittumik aallartitaqalerneq, Kuupik Kleist aviisimut Politikenimut oqarpoq.

Powered by Labrador CMS